BEPLAN JOU REIS
3 Bly eerder langer
Die versoeking is groot om Moremi, Khwai, Savute én Kasane in tien dae in te prop, maar die werklikheid is dat 2-3 nagte in Khwai heeltemal te kort is. Kamp eerder 9-10 dae hier of, indien jy ’n groter verskeidenheid wil sien, 5 nagte elk in Khwai en Savute. Moremi lyk in elk geval baie soos Khwai en die pad na Kasane is eintlik ’n reuse-ompad.
4 Spaar vroegtydig
’n Staanplek onder een van Khwai se bome gaan jou heelwat meer uit die sak jaag as ’n kolletjie in Satara – begin dus sommer nóú al spaar. SuidAfrikaners betaal BWP300 (R388) p.p. by Magotho en BWP400 (R517) p.p. by Sable
Alley. As jy tussen Junie en September wil gaan, bespreek sommer vandag al vir volgende jaar.
5 Bespreek só
Stuur e-pos na die Khwai-ontwikkelingstrust by khwai@botsnet. bw of bel 00 267 686 2365. Jy kan een van 15 openbare staanplekke by Magotho bespreek of, indien jy heeltemal op jou eie wil wees, vra vir Sable Alley of Matswere – albei is eksklusiewe staanplekke. Kinders van alle ouderdomme is welkom, en hoewel daar nie ’n beperking is op die aantal voertuie nie, word hoogstens 20 mense per staanplek toegelaat.
khwaitrust.co.bw
6 Magotho eerste
As jy by Magotho én by Sable Alley of Matswere wil gaan kamp, begin by Magotho. Hoewel die wildkykgeleenthede hier puik is, is daar meer verkeer as rondom die twee eksklusiewe kampe. Beplan jou reis asof dit ’n besoek aan die Kruger is: Begin waar dit gons en eindig waar dit stiller is.