SÓ LYK DIE KAMPGERIEWE
Magotho
Magotho bestaan uit vyftien staanplekke wat almal ’n paar honderd meter van mekaar af is. Hier is nie elektrisiteit of enige ander geriewe nie, maar nader aan die natuur kan jy beswaarlik. Groot ou kameeldoringbome verskaf hope koelte, en die aangrensende Khwairivier lok enigiets van raserige gevlekte hiënas tot selfs nuuskierige olifantbulle.
Die plaaslike trop blouape sal ook nie twee keer dink om jou graanvlokkies te steel wanneer jy ’n middagslapie geniet nie – maak dus maar seker jou kos is diep weggepak wanneer daar niemand is om ’n ogie oor die kamp te hou nie.
Hoewel jy ’n staanpleknommer op jou besprekingsvorm kry, is Magotho ’n kampterrein waar jy jou eie plekkie kies. As daar reeds iemand op die staanplek op jou besprekingsvorm laer getrek het, hou aan soek tot jy ’n oop staanplek kry wat lekker lyk. Jy móét egter op ’n genommerde staanplek kamp. Roofkampeerders wat sonder om te bespreek opdaag en sommer onder ’n boom van hulle keuse tent opslaan, gaan dubbel betaal.
Iemand van die Khwai-ontwikkelingstrust ry elke aand deur Magotho om besprekings te bevestig; jy hoef dus nie deur te ry Khwai Village toe nie.
Sable Alley en Matswere
Volgens die Khwai-ontwikkelingstrust se webwerf is Sable Alley en Matswere slegs vir geregistreerde Botswana-safarioperateurs en hulle kliënte beskikbaar, maar met ons besoek het een van hulle werknemers bevestig dat enigiemand hierdie twee eksklusiewe kampies kan bespreek.
Albei lê in ’n hardekoolboomwoud wat uitkyk op ’n moeras waar seekoeie en visarende jou teen sonop en sononder vermaak. Hier is ook geen geriewe nie en rondom die kamp ry jy selde in ander selfrytoeriste vas. Daar is egter ’n paar wildkykvoertuie van die omliggende lodges wat hier kom wild soek.
Water
Jy hoef net drinkwater saam te bring. Stort- en skottelgoedwater skep jy sommer uit die rivier of moeras. Maak net seker jy kry ’n kolletjie waar die water vlak en helder is, sodat Oom Krokodil jou nie verras nie. Bring minstens twee leë 20 ℓ-plastiekbottels saam om vol te maak, sowel as ’n 1 ℓ-skepbekertjie om die proses makliker te maak.
Ablusiegeriewe
Hier is nie eens puttoilette by die staanplekke nie; dus moet jy alles saambring wat jy nodig het om gerieflik ’n draai te loop. Ons het ’n diep gat gegrawe, ’n staalplaat met ’n gat daarop neergesit, en toe ons toiletstoeltjie bo-op gesit. Om privaatheid en koelte te skep het ons skadunet met pale gespan.
Daar is ook geen amptelike piekniekplekke in die veld nie, wat beteken jy sal tien teen een in ’n stadium agter ’n boom moet gaan hurk. Ry ’n grafie saam en maak ’n punt daarvan om jou toiletpapier te verbrand of te begrawe, anders gaan die diere dit orals rondstrooi.
Rommel
Gooi jou rommel in swaardiensswartsakke en hys dit saans met ’n tou in die boom op sodat hiënas dit nie oopskeur nie.
Lede van die Khwai-ontwikkelingstrust kom nou en dan met ’n bakkie by Magotho verby om vullis op te laai.
Khwai Village
Indien jou meel, tandepasta of deodorant opraak, kan jy deurskiet Khwai Village toe om die sakie reg te stel. Dit is minder as ’n uur se ry suidwes van Magotho. Hier is ’n winkeltjie wat ’n verrassende verskeidenheid kruideniersware het, goed soos blikkies bone, ys, Coke en selfs yskoue quart Black Label. GPS S19.165944 E23.750944 Let wel As dit baie nat is, is daar ’n paar diep waterkruisings op pad na Khwai Village.