PAPRIKAHOENDERVLERKIES

Verruklike vlerkies

Hierdie hoendervlerkies word eers lekker bros gebraai en dan met ’n taai sous bygedam om dit nóg lekkerder te maak.

Jy benodig

(genoeg vir 6) 1,5 kg hoendervlerkies 3 eetlepels donker bruinsuiker 2 teelepels rissiepoeier 2 teelepels paprika 1 teelepel droë mosterd 1 teelepel gemaalde swartpeper 1 teelepel sout 3 eetlepels appelkooskonfyt 2 eetlepels sojasous sap van ½ suurlemoen

Só maak jy

1 Druk die vlerkies met kombuispapier droog. Meng die suiker, rissie, paprika, mosterd, swartpeper en sout saam. Vryf die hoender goed in met die helfte van dié speserymengsel en hou die res eenkant.

2 Braai die hoendervlerkies vir 15 minute oor louwarm kole ( jy moet jou hand vir minstens 10 tellings bo die kole kan hou). Sprinkel die res van die speserymengsel oor die hoender. Draai die vlerkies nou en dan om en braai dit vir nog 5 minute tot die vel bros en goudbruin is.

3 Meng die appelkooskonfyt, sojasous en suurlemoensap in ’n blikbord. Doop die vlerkies een-een daarin en braai dit dan vir nog 5 minute. Sit dit dadelik voor terwyl dit nog warm is.

Weg Ry & Sleep

sê Hierdie speserymengsel is ook heerlik saam met ander hoenderstukke, veral dye. Onthou net om die braaityd aan te pas.