Maklike sosaties

HEUNING-EN-BIERHOENDER FILETTE

Met hierdie maklike metode kan jy hoenderborsies sappig braai en op sosatiestokkies voorsit sonder om blokkies daarop te ryg.

Jy benodig

(genoeg vir 4) 4 hoenderborsies sonder vel of been, in die lengte middeldeur gesny 250 g strepiespek VIR DIE MARINADE ¾ koppie bier ¼ koppie heuning 1 teelepel rissievlokkies 1 teelepel dijonmosterd ¼ koppie sojasous 2 eetlepels olyfolie

Só maak jy

1 Meng al die bestanddele vir die marinade. Sit dit saam met die hoender in ’n Ziploc-sakkie en marineer dit oornag.

2 Ryg die hoender en spek in die breedte op sosatiestokkies. Gaan soos volg te werk: Sit 4 spekrepies en 3 hoenderfilette om die beurt langs mekaar (begin en eindig met spek) en steek dit met 3 sosatiestokkies vas – een aan die bokant, een in die middel en een onder.

3 Braai die hoendersosaties oor matige hitte tot gaar en verf die heeltyd van die marinade daaroor. Haal dit van die kole af en sit dit op ’n bord. Trek die middelste stokkie uit en sny die vleis waar dié stokkie was sodat dit twee aparte sosaties maak. Sit dit dadelik voor.

Weg Ry & Sleep sê Die hoender en spek kan in die marinade gevries word.