BLY VEILIG

In die woonwa, tent of ryhuis

Gebruik slegs verwarmers en stowe wat spesiaal ontwerp is vir gebruik in ’n woonwa. Moet nooit jou gasoond as ’n verwarmer inspan nie. Gaan al die koppelpunte na vir lekplekke vóór jy die gasbottel oopdraai.

In die algemeen

Gaan jou seëls, O-ringe, silinder en reëlaar gereeld na. Let op hoe hoog die vlam brand. Die stoof hoef nie op volle sterkte te brand as jy net koffiewater kook nie. Maak seker daar is genoeg vars lug. Moenie die gasbottel oopdraai voor jy gereed is om aan te steek nie.

Weg Ry & Sleep sê Die wet sê in gevalle waar jy ’n gasbottel in jou boswa of woonwa hou, moet dit in ’n kompartement wees wat lugdig na binne is met ventilasie na buite (SANS 10087). Die wet bepaal ook jou gasbottel moet op só ’n manier vasgemaak wees dat hy nie loskom as ’n krag van tot vier keer sy volle gewig hom tref nie.

Vir ’n lys van erkende LP-gashandelaars in Suid-Afrika gaan na lpgas.co.za. Hier kry jy ook ’n lys van erkende en goedgekeurde handelsname van LP-gas. As jy nog vrae het, kan jy die veiligheidsvereniging vir vloeibare petroleumgas bel by 011 886 9702.