WILDER AS DIE WILDTUIN

2012 ISUZU KB300 (DUBBELKAJUIT)

Met ’n bietjie meer grondvryhoogte en ordentlike skokbrekers sal “Willehond” ’n tropleier wees, sê Gerhart Niewoudt van Magaliesburg.

Ek het die Isuzu in 2015 tweedehands gekoop vir R260 000, en in die twee jaar dat ek met hom ry, het ek hom al toegerus met ’n bosbreker, aluminiumkappie en 17”-wiele. Ek is ook heel tevrede met my brandstofverbruik van net onder 11 ℓ/100 km. My vorige bakkie was die Ford Ranger 2.2 (dubbelkajuit) – met hom het ek probleme met die koppelaar gehad.

Ek het al die pad Botswana toe gereis met Willehond en dit was onvergeetlik. Dis nou wildernis in die ware sin van die woord. Ongerep en mooi, en ’n plek waar die mensdom nog nie sy merk so erg gemaak het nie.