Noordwes se stil nooi

BUFFELSPOORTDAM

Die Buffelspoortdam lê net buite Mooinooi, teenaan die Maanhaarrandpad. Op sy beurt lê die dam dwars voor jou soos jy deur die hek ry. Die oorkantse wal is omtrent ’n halwe kilometer ver en die waters loop 3 km van links na regs met die damwal heel links.

Die kampgedeelte is op diékantse wal en loop omtrent een kilometer teen die oewer af. Die staanplekke met krag is links voor en die meeste van hulle is op netjiese groen gras – en elkeen het sy eie braaiplek. Twintig van hulle grens aan die water en is duidelik afgebaken. Hengel van hier af word net in die wintermaande toegelaat, maar op die staanplekke verder teen die oewer af kan jy heeljaar kom kamp en visvang.

Hier is twee badkamers. Die een is in die middel, tussen die staanplekke met krag. Hier is ’n opwasplek en ruim storthokkies met ’n bankie in die middel van die vertrek. Aan die verste kant, weg van die hek, is ook ’n ablusieblok vir die mense wat op die groot grasperk sonder krag kampeer.