Keelvol(ledige geboortesertifikaat)?
Ons hoor by ons Facebook-vriende wie gesukkel het om hulle kinders se volledige geboortesertifikaat – ja, daai “unabridged” een – te kry en vir wie dit ’n maklike proses was.
Linda Jager
Ons het in Sasolburg aansoek gedoen om die sertifikate en het albei binne twee weke ontvang. Vinning en pynloos. Dit was dieselfde toe ons om ons paspoorte aansoek gedoen het. Ek het gevind die kleiner kantore werk vinniger as die grotes. Dis seker omdat hulle ’n kleiner volume inligting het om te verwerk.
Marius Kritzinger
My vrou het dit binne vyf minute gekry, terwyl my skoonsus agt maande moes wag.
Johan du Toit
Ons het omtrent ’n jaar gewag vir ons kind se volledige geboortesertifikaat.
Rina Bothma Pieters
Die proses vir my jongste se sertifikaat was baie vinnig en ons het dit binne twee weke gekry. Vir my oudste s’n het ons langer gewag, en ons moes uiteindelik ’n spesiale brief kry om te sê ons het betyds daarom aansoek gedoen. Die dag toe ons by die grenspos aankom, kry ons die SMS wat sê ons kan die sertifikaat gaan afhaal.
Vicky Nel-Van Zyl
Ons het ses maande gewag. Drie dae voor ons moes ry, het ek in die grootbaas van Akasia se kantoor in trane uitgebars! My toneelspel was fantasties. Ek kon my sertifikate die volgende oggend gaan afhaal.
Jana van Huyssteen
Ons het geen probleme gehad nie. Een van ons kinders s’n was nie gereed nie, maar Binnelandse Sake het vir ons ’n brief gegee en ons is daarmee oor die grens, sonder probleme.
Jacques en Gerranda Möller
Ons het in Maart 2017 aansoek gedoen en ons het dit nóú nog nie gekry nie. Blykbaar is die Pretoriase kantoor ver agter met die aansoeke.
Madeleine Erasmus
Ons het ons seun s’n saam met sy paspoort gekry, sonder enige probleme. Ek moet egter noem dat ons in Julie reeds aansoek gedoen het vir ons reis in Desember. Ons wou nie enige kanse waag nie.
Hanlie Williams
Ek het my kinders s’n baie vinnig gekry. Destyds toe daai wet ingekom het, het ek dadelik gaan aansoek doen. Twee weke later het ek hulle gekry.
Sunette Davel
Ons het ’n agent gebruik en die volledige geboortesertifikaat binne drie dae gekry. Ja, dit het wel ’n bietjie ekstra gekos, maar dit was deur en deur die geld en moeite werd.
Riki Mellet
Ek het twee jaar en agt maande gewag. Elke keer as ons Mosambiek toe wil ry, moet ek vir ure gaan sit en wag by Binnelandse Sake en verduidelik hoekom ek ’n brief wil hê om oor die grens te gaan. Een keer het hulle selfs vir my gesê ek moet maar terugkom op die dag wat ek ry, dan sal hulle my miskien kan help. Ná ’n groot storie moes ek my 16-jarige kind herregistreer en ’n verklaring aflê waarin ek sê ek het hom nooit by geboorte geregistreer nie. Daarna moes ek nog steeds drie maande wag voor ek ’n volledige geboortesertifikaat kon kry.