ROETES WAT ROEP RY LEKKER BY DIE SEE
Die dae toe jy op Suid-Afrika se strande kon ry en in die duine baljaar, is verby. Vandag is daar net ’n handjie vol plekke oor waar jy ’n 4x4-duineroete langs die see kan ry. Vleesbaai is nog een van daai plekke.
Vleesbaai is ’n piepklein vakansiedorp sowat 35 km van Mosselbaai af. Hier is een winkeltjie en ’n pragtige ongerepte strand. Oor Kersfees en Paasfees bars die plekkie uit sy nate met besoekers, maar dis naby genoeg vir ’n daguitstappie van Danabaai, Mosselbaai of Hartenbos af.
Die Vleesbaai-4x4-duineroete is op die plaas Misgunst net buite die dorp. Dit lê in die Fransmanshoek-bewarea, en die 16 km-sirkelroete vat jou deur ’n duinestrook bo die weggesteekte strand tussen die Fransmanshoek-skiereiland in die noorde, en Kanon-natuurreservaat in die suide.
Die roete is regdeur die jaar oop en jy word begelei. Die plaasmense sal jou deurvat en touwys maak oor die truuks van duinery (of met ’n tou uitsleep!). Hier word volstoom op die plaas geboer, en daarom is besprekings noodsaaklik, veral in Desember. Dan is die roete ordentlik besig – van 12 Desember af vertrek daar elke twee uur ’n groep op die roete.
Die roete begin by die plaashuis waar jy jou bande moet afblaas. Die regte banddruk sal wissel van voertuig tot voertuig, maar jy kan begin by minstens 1,2 bar. Die eerste 3 km is taamlik rustig en gee jou ’n kans om aan die sand gewoond te raak. Digby die 4 km-merk is daar ’n gebied wat “Hardebaard” gemerk is, en die naam is heel gepas: Hier is ’n versameling taai duine met knap draaitjies en kort aanlope wat jou >