Pragtige Botswana

Verken 11 dae ons beeldskone buurland – van Lethlekane tot by Kasane in die noorde, en beleef onder meer die Victoriawaterval en die Chobe- nasionale park.

DAG 1

Ons ontmoet mekaar op die dorp Lethlekani, waar almal brandstof ingooi en met tweerigtingradio’s toegerus word. Van daar af vertrek ons na die wye oop vlaktes van die Makgadikgadipanne vir ons eerste nag by Kubu-eiland.

DAG 2

Ná ontbyt verken ons die eiland ’n rukkie voordat ons noord ry op die tweespoorpad, al langs die rand van die leë soutpanne. Ons sal langs die pad stilhou vir middagete. Ons mikpunt vir die aand: ’n kampterrein net buite Maun.

DAG 3

Ons vertoef ’n uur of wat in Maun om weer voorraad aan te vul. Diegene wat wil, kan op ’n uur lange rit oor die Okavangodelta vlieg (dié uitstappie is vir jou eie rekening). Daarna ry ons wes en noord om ons volgende kampterrein te bereik.

DAG 4

Omdat ons reeds ’n paar lang dae agter die stuurwiel deurgebring het, neem ons ’n welverdiende blaaskans op die oewer van die Okavangodelta. Laatmiddag gaan ons op ’n begeleide boottoer op die delta.

DAG 5

Ons ry noord uit Botswana en steek die grens na Namibië oor via die betowerende Tsodilokoppies. Hier sien ons Boesmantekeninge.

DAG 6

Vanoggend kan jy bietjie laatslaap – elkeen besluit self hoe hy die oggend wil deurbring. Laatmiddag neem die Bhejane-span jou op ’n skemerkelkbootrit op die Okavangorivier.

DAG 7

Ons kyk wild in die Mohango-wildreservaat. Rondom middagete hou ons piekniek by een van die pragtige stilhouplekke. In hierdie deel van die Caprivi- nasionale park is daar meer as 300 voëlspesies. Die park huisves ook vier van die Groot Vyf.

DAG 8

Vanoggend pak ons op en ry terug na Botswana deur die Caprivistrook. Ons slaan kamp op buite Kasane in Botswana, waar ons drie nagte gaan deurbring.

DAG 9

Ná ’n lekker ontbyt klim ons op die bus na die Victoriawaterval.

DAG 10

Ons dag begin vroegoggend met ’n drie uur lange wildrit in ’n oop voertuig in die Chobenasionale park. In die namiddag geniet ons ’n drie uur lange bootrit op die Choberivier.

DAG 11

Dis ongelukkig tyd om te groet. Huistoegaantyd!