NEELS SE STOEPTENT

Dit is raadsaam om altyd eers vas te stel wat presies in die waarborg gedek word voordat jy ’n nuwe wa koop, sê Neels van Heerden.

Die Australiese Facebook-groep “Lemon Caravans & RVs” het meer as 36 000 lede, en dis almal mense wat streng gekeur word op grond van hulle wedervaringe met fabrieksfoute (sogenaamde suurlemoene) wat hulle op boswaens, woonwaens en ryhuise aantref.

Ontevrede verbruikers swerm daagliks op dié groep rond om nuwe verhale op te slurp oor “suurlemoene” wat mede-Aussies gekoop het.

Die kampbedryf Doer Onder is baie groter as in Suid-Afrika en die Aussies is ietwat berug vir hulle gekruide woordeskat. Die gevolg is dat vervaardigers behoorlik moet bontstaan wanneer die mense van die groep onder hulle begin inklim.

Ek verkies om eerder na ’n woon- of boswa met ’n magdom fabrieksfoute as ’n “gooinartjie” te verwys. ’n “Gooi-nartjie” is natuurlik een wat jy by ’n smous gekoop het met die belofte dat dit stroopsoet en pitloos is. Maar wanneer jy by die huis kom, is dit óf suur óf smaakloos en vol pitte. Dan dink ek altyd terug aan die jare toe ’n mens ’n sakkie nartjies buite Loftus Versfeld of Ellispark kon koop en as dié oneetbaar was – en jou span span was boonop besig om te verloor – het jy die naaste ondersteuner van jou span se teenstanders gesoek en hom met ’n “gooi-nartjie” bestook.

Dis mos maar deel van ’n mens se natuur om ’n teiken te soek wanneer ons van ons frustrasies ontslae wil raak. Dieselfde geld heel duidelik op sosiale media.

INDIEN JY DIT oorkom dat jy ’n nuwe wa met verskuilde gebreke koop, word jy beskerm deur die Verbruikerswet, wat bepaal dat die verbruiker in sekere omstandighede die reg het dat ’n voertuig herstel of vervang moet word of dat die verkoper die geld moet terugbetaal. Lees dus altyd eers die fynskrif vóór jy die koopkontrak onderteken.

Vergewis jou ook van wat presies onder vervaardigers se waarborg gedek word en hou in gedagte dat jou wa of ryhuis gereeld gediens moet word. Jou waarborg kan verval indien jy versuim om dit te doen.

Onthou van houtvrot wat dikwels op ouer waens veroorsaak word as die wa nie gereeld geseël word nie.

Ek het op die webwerwe van ’n klompie internasionale vervaardigers rondgesnuffel om te kyk hoe hulle waarborge hanteer. Een voorbeeld is die Britse vervaardiger Bailey Alu-Tech, wie se waens verkoop word met ’n waarborg van ses jaar teen enige waterlekkasies. Dit is omdat die bakwerkpanele met ’n permanente seëltegniek aanmekaargesit word.

Plaaslike waens wat van veselglas vervaardig is, kan glo ook nie houtvrot kry nie en teoreties verhoog permanente seëls en veselglaspanele die tweedehandse waarde van sulke waens.

’N KLOMPIE JARE gelede koop ek ’n splinternuwe woonwa, en terwyl ons hom by die handelaar inspekteer, vind ek en die verkoopspersoon 27 foute. Die fabriek stuur ’n afvaardiging om self te kom kyk en hulle vind ’n verdere 5 foute.

Die woonwa word dadelik teruggeneem fabriek toe en ek wag uiteindelik ’n maand vir my nuwe wa omdat hulle strenger gehaltebeheer toegepas het op die nuwe besending.

Een van die manne van die fabriek fluister so terloops in my oor dat woonwaens wat op ’n maandeinde se Vrydag van die produksielyn afrol, geneig is om vol foute wees. Dit is glo omdat maandteikens gehaal moet word, wat lei tot kitsverva ardiging en verslapte gehaltebeheer.

’n Familielid het onlangs met sy peperduur boswa deur Botswana getoer. Na ’n klompie dae merk hy op dat die boswa al hoe skewer lyk. Later knak die boswa en hy sukkel-sukkel terug huis toe.

Die vervaardiger, handelaar en versekeraar gooi nou oor en weer nartjies, want laasgenoemde beweer die skeeftrek en knak is weens swak vakmanskap, terwyl die handelaar my familielid daarvan beskuldig dat hy woes gesleep het. En die vervaardiger? Hy beantwoord nie oproepe nie.

Dit laat ’n bitter smaak wat jy nie eens met die soetste nartjie uit jou mond kan kry nie.

Hou in gedagte dat jou wa of ryhuis gereeld gediens moet word. Jou waarborg kan verval indien jy versuim om dit te doen.