Dit hael wraggies in die woestyn!
Sowat 130 mm – dís hoeveel reën geval het in die Nossob-ruskamp in die Kgalagadi-oorgrenspark – in één uur! Op 7 April rondom 2.20 nm. het ’n hengse haelstorm losgebars. Haelballe – sommige so groot soos gholfballe – het neergekletter op voertuie, tente, bome en diere. (Terloops, terug by die huis het die versekering ons voertuig afgeskryf.)
Die hael het die ablusieblok en winkel se vensters gebreek, windskerms versplinter, tente geskeur en gazebo’s verniel. Die wind het tafels, breekware, tentpenne en seilskerms tot sover as 50 m weggeslinger!
Ongelukkig het van die kleiner diere, soos grondeekhorings, voëls en selfs ’n pofadder in die slag gebly.
Die SANParke-personeel het ekstra tente opgeslaan en die nat klere en komberse is in die waskamer gehang. Kampeerders moes hulle tente na hoërliggende dele skuif.
Die pad tussen die Dikbaardskolkpiekniekplek en Nossob het ’n rivier geword. Mense het gesukkel om deur te ry en ander moes terugkeer na die Twee Rivieren-ruskamp. Mense het ook in konvooi gery en mekaar uitgesleep indien nodig.
Ek het na die skuiling gegaan en die Nossobrivier sien vloei – wat ’n gesig!
Die ervaring het ons nuwe respek vir die natuur gegee. AMANDA EN DENNIS WALDEN,
Johannesburg SKRYF AAN ONS EN WEN!
Amanda wen ’n Zartek ZA748-tweerigtingradiostel ter waarde van R2 000. Die ZA-748 het uitstekende klank en reikwydte binne en buite. Dis kompak maar duursaam en sal op die langpad hou. ’n Li-ION- herlaaibare battery is ingesluit; dit hou sowat 35 uur. Lees meer by
zartek.co.za