Pofadder en die Pajero

Ná die blomseisoen keer mense altyd terug met allerlei reisstories, en ek kan nie help om ook ons blommetoer van twee jaar gelede te onthou nie.

Sowat 15 km voor Pofadder het ons Pajero se enjin begin warm word. Gelukkig het ons water in die motor en met aanvullings uit krippe langs die pad haal ons Pofadder om 12.15 nm. op ’n Sondag. Die dorp is doodstil. By die Shell-motorhawe is Andrie van Niekerk, die eienaar, se nommer teen die deur opgeplak.

“Die ‘wêls plug’ tussen die enjin en ratkas het ’n gaatjie in, maar die goeie nuus is dat ek hom teen Dinsdagoggend reg sal hê,” sê Andrie se seun, Andries.

My moed lê in my skoene – die hoteleienaar wat motors verhuur, is reeds met vakansie.

’n Wit dubbelkajuit daag op en toe die vriendelike Joan Nieuwoudt hoor van ons penarie, bied sy hulle Ford Ka aan.

Die Ka word gelaai en na middagete by Joan se koffiehuis langs die motorhawe is ons weer op pad.

Dinsdagoggend lui my foon. “Oom se Pajero is reg. Ek het sommer al die ‘wêls plugs’, en nog ’n pypie met erge korrosie vervang,” sê Andries.

Ek skakel Joan met die goeie nuus – sy vra dat ons die Ka sommer by die motorhawe los. Sowat 40 km voor Pofadder kry ons hulle langs die pad. Ons hou stil en groet. Joan wil niks weet van vergoeding nie en ek moet amper geweld gebruik om ’n paar note in haar sak te kry.

Die vriendelike mens-mense van Pofadder het ons besoek aan die Namakwaland en sy blomme gered!

WILLEM BOSCH, Bloemfontein >