Proe wyn
Hier is 15 wynplase in die Hemelen-Aarde-vallei. Hamilton Russel en Bouchard Finlayson was twee van die eerstes en is bekend vir hulle wêreldgehalte chardonnays en pinot noirs.
Terloops, dié wingerde is eintlik redelik jonk – die eerste blokke is in 1976 aangeplant. Hermanus Wine Hoppers se oop voertuie stop elke halfuur op afgespreekte plekke in die vallei. Koop ’n dagkaartjie en klim op en af soos jy wil.
Kyk op die webblad vir vertrektye en koste: hermanuswinehoppers.co.za; 076 991 2498
Ons gunsteling-wynplase: • HAMILTON RUSSELL Dis die vallei se baanbrekerwynplaas: Hamilton Russell is in 1975 gestig en die eerste oes is in 1981 geproduseer. Dit is ook een van die suidelikste wynplase in Afrika. Die plaas se chardonnay en pinot noir wen pryse en hulle maak ook fynbosheuning en olyfolie. En hier word af en toe luiperds op die landgoed gesien! Maandag tot Vrydag: 9 vm.-5 nm.; Saterdag: 9 vm.-1 nm. Kontak 028 312 3595;
hamiltonrussellvinyards.com • ATARAXIA Die proelokaal is in ’n ou kerkie bo-op ’n heuwel met ’n uitsig oor die wingerde en berge. Maandag tot Vrydag: 9 vm.-4 nm.; Saterdag en openbare vakansiedae: 10 vm.-5 nm. Kontak 028 212 2007;
ataraxiawines.co.za • CREATION Hierdie wynplaas het ’n paar innoverende proe-opsies soos wyn-en-sjokolade (R105 p.p.); ’n nie-alkoholiese proe vir dié wat moet bestuur, met allerhande teesoorte en southappies (R310 p.p. vir agt soorte tee); en ’n Kids Surprise met sap, gegeurde melk en gesonde eetgoed vir kinders van 5-12 jaar (R75 p.p.) Besprekings word aanbeveel. Daagliks van 11 vm.-4 nm. Kontak 028 212 1107;
creationwines.com