ALTA OOSTHUIZEN
Canon EOS 7D Canon 17-40 mm-lens
TOAST SÊ: ’n Goeie landskapfoto het ’n gevoel van drama en Alta s’n het hope hiervan. Dis geneem by Giant’s Castle in KwaZulu-Natal. Die hoë berge in die agtergrond is ’n goeie begin, maar dis die donker wolke wat die foto woema gee.
Alta het teen ISO 100 geskiet, wat gesorg het vir ’n helder foto sonder kolle wat te greinerig voorkom (wat soms gebeur wanneer jy jou ISO hoër opskuif na byvoorbeeld 800). Haar sluiterspoed was stadig: 1/20ste van ’n sekonde. Dit het gehelp dat haar lensopening redelik klein kon wees (f11), wat weer sorg vir die goeie fokusdiepte. Goeie fokusdiepte beteken dat die grootste deel van Alta se landskap – van die gras hier voor tot die kranse doer ver – in fokus sal wees.
Maar waarom só ’n stadige sluiterspoed kies? As jy ’n driepoot gebruik, kan jy hiermee wegkom én jou foto ’n ekstra tikkie gevoelswaarde gee. Kyk fyn: Die blare van die wabome in die voorgrond is plek-plek effens uit fokus. Dié bewegings- blur verlos die foto uit sy andersins statiese posisie.
Die kyker kry nou ’n idee van die wind wat waai, die veranderende weer – daardie byna elektriese gevoel in die atmosfeer wanneer ’n storm in die Drakensberg opbou.
Goeie werk, Alta, ek hoop jy was terug by die motor voordat die reën jou gevang het. >