OZtrail Multi Shade 6-strandskuiling
Die strandsambreel is uitgedien. Hulle val maklik om, jy moet dit gedurig skuif, draai en kantel sodat die skadu oor jou handdoek val, en die speke knak maklik wanneer die Suidooster spoed optel. Gedurende Desember by Sodwana aan die Noordkus, of Tietiesbaai in die Weskus is ’n strandskuiling ’n beter keuse.
Wanneer ’n rukwind jou buurman se sambreel opraap en soos ’n vreemde vlieënde voorwerp hóóg bo die strand laat tol, kan jy houtgerus onder jou skuiling lê en die konsternasie bekyk.
Dié strandtent is groot genoeg vir ses volwassenes en sy boseil is geweef van ’n spesiale poliëster wat glo 98% van die son se skadelike UVstrale keer. Gaas-sypanele keer dat hy te warm word aan die binnekant en die poliëtileen-grondseil is bestand teen stekelrige onkruid wanneer jy op ’n munisipale grasperk uitspan. Twee buigsame veselglaspale oorkruis mekaar om die tent dubbel stewig te hou in winderige toestande, en tentpenne en sandsakke word verskaf om hom te anker wanneer jy en jou maats in die branders baljaar en dit alleen agterlaat.
Met my eerste probeerslag kon ek die tent manalleen binne 6 minute opslaan terwyl my gesin toekyk. Met die tweede probeerslag en vele hande kon ons dit saam in sowat 4 minute regkry. Teen ’n rapsie meer as 4 kg is die gewig boonop soortgelyk aan dié van ’n groot strandsambreel. Gewig 4,3 kg Afmetings (opgeslaan) 335 cm breed, 215 cm diep, 175 cm hoog Afmetings (opgepak) 17 x 17 x 70 cm Prys R1 500 by Trappers ( trappers.co.za)