Wat Weg nie gesê het nie...
Ek verwys na Weg se 2016-Botswanagids. In my 62 jaar het ek nog nie so ’n winskoop raakgeloop nie. Vir net R57,50 kry jy al die nodige telefoonnommers, GPS-punte, kaarte en blyplekke vir jou selfryBotswana-toer.
Ons het ’n sirkelroete gery van Gauteng af via die Kgalagadioorgrenspark, Kang, Maun, Shakwe, Katima Mulilo, Kasane, Nata en weer uit by Palapye. Hier’s is ’n paar dinge wat Weg nie gesê het nie:
Weg het nie gesê ek moet my eie mokoro saambring nie. Die Kalahari, Angola, Namibië en Zimbabwe het baie reën gekry en heelwat van Botswana se kampplekke was onder water. Die Moremiwildreservaat was drie weke gesluit weens oorstromings. (Maar hoe moes Weg geweet het!)
Behalwe vir die duisende donkies, beeste, bokke en honde is daar miljoene skoenlappers op die pad wat van jou voorruit ’n gemors maak as jy dit waag om jou ruitveërs aan te sit.
Die 2,8 km lange grondpad na die Island Safari Lodge naby Maun het my 45 minute geneem om te ry, en die watergate in die pad was sowat 500 mm tot 700 mm diep.
Van die woonwastaanplekke is nie op standaard nie. Ek weet Weg probeer diplomaties wees, maar ná ses uur van stampkarretjies speel op die teerpad wil jy darem ordentlike ablusies hê. Wil Weg nie ’n soort graderingstelsel implementeer soortgelyk aan dié van die woonstelverhuringsklubs nie?
Die Shametu River Lodge (foto bo) naby Divundu in die Caprivi is tops. Die nege kamplekkke het sy eie ablusie en kombuis. Ek het my eerste tiervis van 3 kg op die Okavangorivier gevang.
Weg moes my gewaarsku het teen die muskiete. Ag, jammer, julle het, maar ek het nie opgelet nie. Hier teen 5 nm. kom hulle vir jou, boeta, al het jy sitronellaroom en muskietweerder aangesmeer. ’n Groot waaier in die woonwa het baie gehelp.
Weg het ook nie gesê dat die Victoriawaterval ’n skouspel is met so baie water nie, en dat ek my hart in Namibië sou verloor nie. Dankie, Weg, dat jy so ’n goeie toergids is.
BEN EN ELENA VAN WYK, Pretoria >