6 DOENDINGE
1 Soek avontuur
As jy hou van roei, vaar en perdry, is Outdoor Focus jou eerste stilhouplek. Huur ’n kajak. Verken die marina op jou eie of skep ’n begeleide roete op grond van jou vaardigheidsvlak. Hier is ’n 11 km- en 21 km-roete waar jy tot by die Mansfield-wildreservaat kan roei en daar oorslaap. Die koste wissel van R30 vir ’n klein kano per uur, tot R350 vir ’n dubbelkajak vir 6 uur. Galop op die strand. Beginners en ervare ruiters is welkom. Die standaardrit is strandlangs van naby die Boesmansriviermonding tot by Kwaaihoek, maar hier is ook ’n sewe dae lange roete verby nog strande en deur plaasgrond langs die kus en wildreservate. Nog ’n opsie is die Three Sisters-roete, wat ook ’n stuk roei insluit. Die koste wissel op grond van die groepgrootte en die roete wat jy kies (vanaf R300 p.p. vir die standaard-strandrit). Braai op ’n trekskuit. Kies tussen ’n 90 minute lange riviervaart (R80 p.p.) of ’n 2,5 uur lange braaivaart (R130 p.p.). Bring jou eie kos en drankies. Laat jou hartklop versnel. Outdoor Focus bied ook ’n een uur lange hoëspoed-seevaart (R270 p.p.), skubaduik (vanaf R320), duinplankry (R140) en
diepseevisvang (R850). Waar? Kiddies Beach, Kusweg Kontak 046 624 4432; outdoorfocus.co.za
2 Kyk wat skud in Wharfstraat
Wharfstraat is waar skepe in die 1820’s vasgemeer het. Die historiese geboue is goed bewaar en dit is waar jy van die oulikste restaurante in die dorp sal kry – en ’n paar interessante karakters. Ons beveel dié restaurante aan: Café Reset. Die restaurant is weggesteek in ’n stegie en het ’n rustige binnehof waar jy kan asem skep. Bestel ’n lang glas van die plaaslike Kowie Gold Pilsner (R28) en ’n Italiaanse panini (R70). Port Alfredstraat 10 (net langs Wharfstraat); 082 793 2050 The Little Brewery on the River. Dis waar jou Kowie Gold vandaan kom. Die brouery het in 2009 ontstaan en die bier word deur Collin Coetzee gebrou. Besoekers kan ’n toer van die brouery doen, en daarna drie van Collin se biere proe: Kowie Gold, Squire’s Porter en Coin Ale. Die toer en proe duur sowat 45 minute en kos R50 p.p., wat ’n pint van jou gunsteling insluit. Wharfstraat 20; 046 624 5705; littlebrewery.co.za The Wharf Street Brew Pub. Lê weg aan vis-en-tjips terwyl Bram Coetzee jou graag die geskiedenis van Wharfstraat, en meer oor Port Alfred in die algemeen vertel. “Hier’s iets vir almal,” sê hy. “Jy kan marlyn vang, hier is meer as 50 wildreservate binne ’n 100 km-radius en hier’s nie malaria nie.” Wharfstraat 18; 046 624 4947
3 Draai die horlosie terug
As geskiedenis jou ding is, gee Port Alfred jou hope stof. Kowie-museum. Leer meer oor die amaXhosa-stamme wat eerste in die omliggende gebiede gebly het, die storie van die Britse Setlaars van 1820, die grensoorloë, die verskeie skeepswrakke langs die kus en hoeveel wandelhowe in 1887 gebruik is. Hier’s ook ’n argief waar baie afstammelinge van die Setlaars aanklop om hulle stambome uit te pluis. Die toegangstarief is R20 per volwassene; R10 per skolier, gratis vir klein kinders. Die museum is in die ou Port Alfred-stasie in Pascoe-singel, Hoofweg; 071 288 8228 Antiekemotormuseum. Dis oop op die laaste Saterdag van elke maand. Die motors is meestal Dave Hawkins s’n. Hy versamel al die afgelope dekade ou motors en motorfietse en knap dit op. Hy het ook ’n versameling van elke motor wat in ’n James Bond-fliek gebruik is – dis miniatuurmodelle. Een van sy gunstelingmotors wat uitgestal word, is ’n 1938 MG Model TA met ’n afwerking in Britse wedrengroen. Hier’s geen toegangstarief nie, maar besoekers kan skenkings maak om te help om die uitgawes te dek. Hawkins-nywerheidspark, Alfredweg 91; 046 624 2214
4 Sit jou tone in die sand
Die Sonskynkus het meer as 300 km se netjiese strande en in Port Alfred het jy ’n paar om van te kies. Kelly’s Beach. Die eerste strand in die Oos-Kaap om Blouvlagstatus te kry en die beste swemstrand in Port Alfred. East Beach. Hierdie is die “aktiwiteite”-strand, links van die wandelhoof as jy vir die see kyk. Hier’s ’n bekende surf- kol, groot sandduine om sandplank te ry en heelwat plek vir ’n lang, rustige wandeling. (Dit vat sowat twee uur om al die pad tot by die vuurtoring en terug te stap.) West Beach. Hier’s baie strome, en om te swem is dus verbode, maar die strand het heelwat plek om te sonbaai en te ontspan. As jy lekker warm gespeel is, gaan na Guido’s langs die parkeerterrein vir ’n yskoue bier om dinge weer te normaliseer ( 046 624 5264). Kiddies Beach. Hierdie is ’n veilige strandjie langs die rivier, met lekker vlak water om in te swem. Soos die naam aandui, is dit ideaal vir kinders. Parkeer langs Kusweg naby Outdoor Focus.
5 Speel ’n rondte gholf
Die Royal Port Alfred-gholfklub is in 1907 gestig en koning George self het dit in 1924 “koninklike” status gegee – een van net vier in Suid-Afrika en 66 in die wêreld.
Die baan is ’n links- baan en van die hoë plekke af het jy mooi uitsigte oor die see. Bosbokke, rooibokke, duikers, blesbokke en ’n paar skaars koffiekleurige springbokke woon hier en kom kyk soms hoe lyk jou dryfhoue – wees maar op jou pasoppens. Hier is glo gemiddeld 12 kolhoue per jaar – bespreek ’n rondte en kom kyk of jy een van dié gelukkige 12 kan wees!
Die klub het ook ’n klein mashie- baan vir jonger spelers en hou op die derde Vrydag van elke maand ’n weeg-en-betaal-steakaand. Koste Volwasse besoekers betaal R280 vir 18 gate en R200 vir 9 gate. Waar? St. Andrewsweg Kontak 046 624 4796; rpagc.co.za
6 Ontmoet vir Gambit, die mak kameelperd
Die Mansfield-wildreservaat is ’n private beskermde gebied van 500 ha net buite Port Alfred op die oewer van die Kowierivier. Hier is nie gevaarlike diere nie, maar jy kry kans om ’n parmantige outjie met die naam Gambit te sien – sekerlik een van die kameelperde in die wêreld wat die meeste afgeneem word. ’n Plaaslike veearts het die jong weeskameelperd aangeneem, maar die langnekkêrel was gou te groot vir die veearts se eiendom en dié het hom aan Mansfield geskenk. Jy kan baie naby aan hom kom, maar moet asseblief nie aan hom raak nie.
Hier is baie goed om in die reservaat te doen: Hou piekniek langs die rivier (R30 per voertuig/boot); huur ’n kano en gaan roei (R60 p.d.); doen ’n begeleide stap (R50 per volwassene); doen ’n wildrit in jou eie voertuig (R150 per voertuig) of ’n 90 minute lange begeleide wildrit (R150 per volwassene; R75 per kind). Jy kan ook ’n rustige 6 km-roete stap (sonder begeleiding) of een van die voëlskuilings met jou verkyker besoek. Waar? Die ingang sit langs die R67, sowat 6 km stroomop van Port Alfred af. Kontak 046 624 8199;
riverhotels.co.za