Bulhoek-slaghuis, Noordwes
As jy ’n Bosvelder is en gereeld die goor R511 tussen Brits en Thabazimbi ry, dan weet jy waarskynlik reeds van die Bulhoek-slaghuis se padstal. Die belangrike nuus is egter dat dit 4 km verder noord teen die pad op geskuif het (hulle’s nie meer langs daai petrolstasie by Greens nie).
Hoewel vleis die hoofrol by Bulhoek speel, kan jy ook vir die res van jou braai hier inkopies doen: Hout, JanPap-braaipap, braaisouse en ys (R5,50 per pakkie) is te koop, asook vars produkte soos groenbone, komkommer en eiers.
Moenie verby die koekierak stap nie. Hier’s onder meer gemmer- en kondensmelkkoekies (R30 per pakkie) en beskuit soos karringmelk (R45 vir ’n 600 g-pak). Nie soet genoeg nie? In die yskas is stoute dinge soos koeksisters (R32 per pak), kolwyntjies (R30 vir 6) en melktert (R30).
Droëwors en die dodelike cabanossi kos R175/kg. (Waarskuwing: Moenie te min koop nie! Jy gaan nóg wil hê! Moenie sê ons het julle nie gesê nie.) Wildsbiltong is R230/kg en bees R240/kg. (Onthou: Pryse kan verander.)
Ander vleispryse: boerewors R74,90/kg en kruisstuksteak R115,95/ kg. Hulle verkoop ook ’n Weekpak-vleis teen R500 wat 2 kg wors, 2 kg maalvleis, 1 kg steak, 1 kg skaapvleis en 1 kg hoender insluit.
Bulhoek maak verder interessante goed soos blindevinkies. Ek moes vra wat dit is: Dis ’n kaasworsie toegedraai in ’n stukkie steak, gedoop in Jimmy’s-sous. Nou weet jy. Dit kos R89,90/kg.
Jy kan ook enkele wegneemetes bestel: R15 vir ’n beesmaalvleisjaffel en R15 vir ’n bakkie varkkaiings en pap. Waar? 34 km noord van Brits langs die R511. Oop Ma.-Vr.: 7.30 vm.-5.30 nm.; Sa. 7.30 vm.-1.30 nm. Kontak 012 277 1499 (Francois of Hettie Swart)