WILLEM’S RUS
Willem’s Rus is enige kampeerder se droom. Die 25 staanplekke is almal goed versorg en die hele plek is silwerskoon.
Willem’s Rus is ontwerp deur die eienaars, Jeanette Vorster en haar man. Hulle is duidelik self kampeerders en het moeite gemaak om elke staanplek gerieflik te maak. (Hulle het ook ontslae geraak van die goed waarvan hulle self nie hou nie – soos daai grillerige plastiekstortgordyne wat aan ’n mens vaskleef.)
Selfs nie-kampeerders sal dit geniet om ’n nag hier onder die sterre deur te bring en te luister hoe leeus brul en jakkalse tjank. Geriewe Hier is 25 staanplekke, met party wat groter groepe kan huisves. Elke staanplek het ’n kraan, hier is meer as genoeg kragpunte en hier is binne- en buitewasgeriewe. Staanpleknr. 1, 2 en 3 is weggesteek en sal waarskynlik die stilste wees. Hulle moet saam bespreek word en deel ’n lekker boma en ’n private badkamer met ’n buitestort. Staanplek nr. 4 en 5 het die beste uitsig oor die watergat.
Die res van die staanplekke deel twee silwerskoon ablusieblokke, met baddens en buitestorte.
Hout en ys is beskikbaar by die ontvangskantoor. WENK Die webblad het foto’s van byna al die staanplekke – jy kan dus kies voordat jy bespreek. Wildritte is op aanvraag beskikbaar. Wat pla? Ek het in die week gaan kuier en die kampplek was byna leeg. Naweke mag dalk ’n ander storie wees. Jy moet maar net hoop jou buurman is nie ’n amateur-trekklavierspeler nie... Hoe kom ek daar? Gaan Dinokeng deur die hoofhek (Tau) binne en draai net ná die “Safari Mall” regs op die De Wagensdrift-grondpad. Ry sowat 2 km aan en draai regs in Patrysstraat. Ry nog 1,6 km tot by ’n kruising. Draai dadelik hierna 145 ° links en volg die pad vir 200 m. Koste Vanaf R420 per staanplek vir tot vier mense en een voertuig, plus R90 p.p. wat bykom en R60 per voertuig wat bykom. Kinders kry afslag. Kontak 081 702 2989 (Jeanette); willemsrus.co.za
WILLEM’S RUS