CHAMELEON BUSH LODGE

So mooi soos die veld hier rond is, bly dit droog. Daarom voel die luukse eenhede by die Chameleon Bush Lodge – met ’n grasperk rondom en ’n welkome swembad – soos ’n oase in dié vaal omgewing.

Al die eenhede kyk uit op ’n watergat en hier’s hope voëls – moet dus nie jou verkyker by die huis los nie. Die eenhede is selfsorg en het onderdakbraaiplekke. En die gesinseenhede het selfs ’n espressomasjien! Geriewe Hier is altesame sewe eenhede: vyf met slaapplek vir 2 en twee gesinseenhede met slaapplek vir 4. Drie van die vyf eenhede is losstaande en het ’n buitestort. Die twee gesinseenhede het ’n yslike kombuis en braaiput buite, asook ’n TV en koffiemasjien.

Die eienaars, Carlien en Chris Pieterse, bly in die Dinokeng-wildreservaat en is besig om ’n kuierplek met ’n lapa en kroeg op die perseel te bou. Dit gaan binnekort die ideale plek wees vir klein groepies wat die hele plek bespreek vir partytjies. WENK Begeleide wildritte en bosstappies is beskikbaar by die ghrênd Mongena-wildreservaat langsaan. Sit jou naam op die lys! Hoe kom ek daar? Vat die Hammanskraal/Boekenhoutskloof-afrit van die N1 af. Draai net ná die tolhek regs en ry bo-oor die snelweg. Vat die eerste afdraai na links: die D48/Rust de Winter-pad. Gaan Dinokeng deur die hoofhek (Tau) binne en ry sowat 5 km tot jy by die Chameleon Bush Lodge uitkom. Bel die nommer op die hek om dit oop te maak. Koste In die middel van die week kos die chalets en gesinseenhede dieselfde: R325 p.p. Oor naweke en op openbare vakansiedae kos die chalets R485 p.p. en gesinseenhede R520 p.p. (enkelreisigers betaal R100 ekstra). Kontak 082 736 9160 (Carlien); 082 454 6535 (Chris); chameleonbushlodge.co.za

’N BOSVELDOASE. Die Chamelon Bush Lodge het sewe eenhede, welige grasperke en ’n oorvloed voëls. Die gesinseenhede het elk ook ’n eie braaiput (onder).