TOERUSTING
Wárm baadjies, handskoene, snoesige pantoffels en ’n ordentlike slaapsak – bly só lekker warm hierdie winter.
Moenie dat die ysige weer jou dié winter binnenshuis hou nie. Ons het ’n lys warm klere en kampgoed saamgestel sodat
jy selfs in die sneeu kan baljaar.
VIR VROUE
1 FIRST ASCENT ESSENCEOORTREKTRUI ’n Aangename eienskap van mikropluisstof is dat dit sag genoeg is om direk op jou vel te dra. Die termodinamiese materiaal laat sweet verdamp, maar hou jou liggaamshitte binne. ’n Pluspunt is die skelhelder pienk! R400 by Outdoor Warehouse en
firstascent.co.za
2 K-WAY WILLOWPLUISSTOFBAADJIE Die hoë kraag en trekkoord sal kil wind van jou nek afhou terwyl die opgestopte bors- en skouerpanele ’n ekstra laag isolasie bied. Die baadjie se vleiende snit volg die kurwes van jou bolyf. R1 000 by Cape Union Mart
3 K-WAY ELSADONSBAADJIE Hierdie wind- en waterbestande baadjie is gevul met egte gansdons sodat jy knus sal bly selfs al val sneeuvlokkies rondom jou. Dit weeg verbasend min en vou redelik klein op. Daar is twee buitesakke en een sak aan die binnekant vir ’n selfoon. ’n Trekkoord om die heupe hou die koue uit. R2 000 by Cape Union Mart
4 CAPESTORM BUSHWACKER-LANGBROEK Dié duursame langbroek het ’n indrukwekkende vyf sakke, elkeen met ’n ritssluiter. Die geplooide nate om die knieë help dat jy maklik kan hurk sonder dat die broek styfspan. Daar is ook trekkoorde in die pype en ’n rek om die heupe sodat jy droog en warm sal bly in stormweer. Al is hy reën- en windbestand, moet jy liefs ’n long john of lang sokkies onder dit aantrek – die materiaal is maar dún. R1 000 by Sportsman’s Warehouse
5 HI-TEC EQUILIBRIO BIJOU MID 1-STEWELS ’n Skoen met ’n oop enkel is dalk gemakliker, maar as jy in sneeu of op gladde klippe loop, is ’n stewel beslis beter. Hierdie stapskoen is ’n skikking tussen gemak en enkelbeskerming. Nie dat dit hoegenaamd ongemaklik is nie – die skokabsorberende sool, waterdigte materiale en opgestopte binnekant sorg vir sorgelose staptogte. R1 300 by Sportsman’s Warehouse
6 BRIDGEDALE WOMEN’S COMFORT SUMMIT-SOKKIES Nie almal is gaande oor lang sokkies nie. Dié paar stop halfpad teen jou kuite en is gemaak van merinowol en ander tegniese materiale sodat jou tone nie afval weens die koue nie. Op een of ander wonderbaarlike manier pas hulle los om jou kuite sonder dat jy hulle heeltyd hoef op te trek. R150 by Cape Union Mart
7 BLACK DIAMOND SUSANNAH-MUS Hierdie sagte mussie is gebrei met ’n gladde akrielstof. Die kabelpatroon is modieus, maar dit sal jou darem nie soos ’n Dowwe Dolla laat lyk teen die hange van Sneeuberg of op ’n windverwaaide Skedelkus nie. R425 by rammountain.co.za
8 K-WAY SITH PRIMALOFT TOUCHHANDSKOENE Lank gelede toe telefone nog knoppies gehad het, was dit glad nie ’n probleem om iemand met handskoene te bel nie. Deesdae met raakskerms is dit egter ’n gelol. Gelukkig het slimkoppe in wit jassies met hierdie handskoene vorendag gekom. Hulle is te dun om Mount Everest mee uit te klouter, maar ten minste kan jy ’n WhatsApp van Ribbokkop af stuur sonder om hulle uit te trek. R200 by Cape Union Mart
SÓ WERK LAE
Dis ’n goeie idee om klere in lae te dra: Elke laag dien ’n afsonderlike doel en jy kan dit soos ’n ui afskil namate toestande warmer word. Die binnelaag raak direk aan jou vel en daarom moet dit sweet kan hanteer. Dit is uiters belangrik dat hierdie laag nie uit katoen geweef is nie. Katoen is geneig om vog te absorbeer en klam te raak. Kies eerder klere wat van poliëster, polipropileen, Spandex, wol of egte sy gemaak is.
Die middellaag hou hitte na aan jou lyf terwyl dit toelaat dat sweet verdamp. Sintetiese pluisstofwol en egte wol is geskikte materiale vir ’n middellaag, en anders as met long johns kan jy in die openbaar daarmee rondloop.
’n Isolasielaag is soortgelyk aan ’n bolaag. Dit is windwerend, maar nie noodwendig waterbestand nie. Dit het beperkte ventilasie, maar is nie so bonkig soos ’n tipiese bolaag nie. ’n Isolasielaag sonder ’n bolaag werk goed in matige klimaat. As die kwik tot onder die vriespunt daal, moet jy eerder ’n spesifieke bolaag aantrek.
Die bolaag is jou beste wapen teen wind, koue en reën. Dis onwaarskynlik dat hierdie baadjie uit enigiets anders as tegniese materiale soos Gore-Tex of nylon bestaan. Die dae van karosse en pelse is lankal getel, want moderne materiale is warmer en dunner. >