RESERVAAT

Soek’ n oorbietjie in die Chelmsfordnatuurreservaat naby Newcastle.

Maak die lang pad van Johannesburg af kus toe ’n bietjie korter en bly oor op die oewer van die Ntshingwayodam. Jy sien dalk die trots van Chelmford in die lang gras: die oorbietjie. KwaZulu-Natal se grootste bevolking van dié vaalbruin bokkie met die swart stert woon in dié reservaat. Wat doen ek hier? Ry die Leokop Auto Trail – ’n goed gemerkte roete wat jou deur die habitats van onderskeidelik blesbokke, oorbietjies en sebras vat, en dan deur ’n moerasland kronkel.

Baie voëls hou in die vlei – kyk hoeveel van die 210 opgetekende spesies julle kan raaksien (kry ’n voëlpamflet by die ingang na die reservaat). Die roete is gewoonlik doenbaar met ’n sedan, behalwe as dit baie gereën het. Maak seker by die ontvangskantoor voordat julle in die pad val.

Nou is dit speeltyd, en die dam wag! Julle kan swem, seil (R100 vir ’n bootpermit), roei, waterski en vlieërplankry. Maar – soos gereelde besoekers sal beaam – die plek waar jy eintlik wil wees, is op jou kampstoel voor jou tent, met ’n vislyn in die water, aan die wag dat ’n karp byt... Slaap hier Hier is chalets (vanaf R500 p.n.) met slaapplek vir vier op die rand van die water. Die chalets word daagliks skoongemaak. Hier is ook twee kampterreine – Sanford en Leokop – met braaigeriewe, warm storte en kragpunte (vanaf R80 p.p.). Die reservaat se winkeltjie verkoop ys, hout, houtskool, koeldranke en peuselhappies. Dagbesoekers R30 per volwassene; R15 per kind. Aanwysings Die reservaat is sowat 360 km suidoos van Johannesburg. Die ingang is 35 km suid van Newcastle met die N11. GPS S27.95875 E29.90664 Kontak 033 845 1000; kznwildlife.com

– Ian McNaught Davis

JOU EIE RIVIEROEWER. Die grasperke by die selfsorgchalets by Chelmsford loop tot teenaan die Ntshingwayodam. Die dam is genoem na ’n Zoeloegeneraal wat sy soldate gelei het teen lord Chelmsford in die Slag van Isandlwana.