’n Ja en ’n nee vir die Kruger
Ek is ’n kwadrupleeg en gebruik ’n aangepaste ambulansbed met batterymotors en handkontrole om te beweeg. Ek lê in ’n groot voertuig om wild te besigtig. Dis uit dié posisie wat ek dié breëkoparend afgeneem het.
Die laaste drie jaar het ek by die Mjejane River-lodge op die oewer van die Krokodilrivier oornag en elke dag ingery wildtuin toe. Vanjaar het ek weer by die Skukuza-ruskamp bespreek en die Onder-Sabie-, Satara-, Pretoriuskop- en Krokodilbrug-ruskamp besoek. Ek was verbaas en teleurgesteld oor die toestand van veral Krokodilbrug en die Afsaalpiekniekplek se badkamers. Mugg & Bean by Onder-Sabie is ’n aanwins, maar kyk vir ’n wyle na bo – die dak is vol spinnerakke. Ons verstaan en ondersteun die beskerming van die ekostelsel, maar plekke waar kos berei en bedien word, het tog standaarde.