Blomkoolpasta
Vir 4 Voorbereityd 15 minute Gaarmaaktyd 15 minute As jy mal is oor blomkool, is hierdie pasta vir jou. Die blomkool word gekook en verpulp tot ’n romerige sous wat jy saam met die pasta en geposjeerde eiers eet. Heerlik én gesond!
Jy benodig
• 1 groot blomkoolkop
(of 2 kleintjies) • 2 eetlepels botter • 3 knoffelhuisies, fyngekap • 1 koppie ertjies • 250 g fettuccinepasta • 1 koppie melk • ¼ koppie room • ’n knippie neutmuskaat • sout na smaak • gemaalde swartpeper na smaak • 4 geposjeerde eiers • 4 eetlepels gerasperde parmesaan
Só maak jy
1 Sny die blomkool in stukke. Hou ’n paar stukkies (sowat ¼ koppie) eenkant en kook die res in kookwater tot sag – ongeveer 15 minute. Dreineer.
2 Smelt solank die botter in ’n pan en braai die knoffel en heel blomkoolstukkies tot gaar. Roer die ertjies deur. Hou eenkant.
3 Kook intussen die pasta volgens die instruksies op die pakkie in soutwater tot al dente.
4 Voeg die melk by die gekookte blomkool en pols dit met ’n handmenger tot glad – werk in sarsies indien nodig. Gooi die gladde blomkoolmengsel by die pan met die ertjiemengsel. Bring dan die inhoud van die pan stadig tot kookpunt en laat vir ’n paar minute prut. Roer die room by, proe en geur dit na smaak met neutmuskaat, sout en swartpeper.
5 Roer die sous deur die gekookte pasta. Bedien elke porsie pasta met ’n geposjeerde eier en ’n eetlepel parmesaan.