WINTERTOERUSTING

Goed, jy’s gestewel en gespoor teen die koue. Kry ook dié goeters om ’n buitevakansie in die winter makliker te maak.

LITTLE HOTTIESVOETVERWARMERS

Sodra jy die plastieklaag aftrek, ontstaan ’n chemiese reaksie wat hierdie kussinkies heerlik warm maak. Trek jou sokkies aan en plak die plakkers op die sole – jou tone sal vir vyf uur dankbaar wees. R40 by Outdoor Warehouse (ook beskikbaar vir hande)

YETI-SKAAPWOLPANTOFFELS

Stel jou voor: Dis yskoud buite jou slaapsak, maar jy móét ’n draai loop. Hierdie pantoffels is makliker om aan jou voete te trek as koue stapstewels en die rubbersool keer dat jy die op die witgerypte grasperk gly. R900 by Cape Union Mart

NOODKOMBERS

’n Noodkombers is in waarskynlik elke ultramarathonatleet se rugsak te vind, want hy weeg feitlik niks nie. Hy neem minder plek as ’n sakdoek in beslag, maar tog kan dit keer dat jy in ysige weer verkluim. R18 by Clicks

CADAC SAFIREVERWARMER

Span jou kampgasbottel in om jou tent warm te maak. Dié verwarmer het drie lae mantelgaas om te keer dat ’n verdwaalde vlam uitlek en jou tent aan die brand steek. Dit het ook ’n vonkaansteker aan die agterkant – weg van die vlam – vuurhoutjies is dus nie nodig nie.. R695 by Outdoor Warehouse

FIRST ASCENT ICE BREAKER-SLAAPSAK

Hierdie slaapsak sal jou lewend hou in -18 °C (en gemaklik in -3 °C). Die kappie het ’n koord sodat jy dit styf om jou kop kan trek. Daar is ook ’n sakkie aan die binnekant vir ’n selfoon en jou kamera se batterye. R3 900 by Trappers en Sportsman’s Warehouse

WOLVERINE HAWTHORNE 8”JAGSTEWELS

Tawwe tienies gaan van hierdie stewels hou. Dit bied nie dieselfde isolasie as sneeustewels nie, maar jy kan dit elke dag dra.

Die 400 g- Thinsulate Ultraisolasie behoort jou voete warm te hou in matige sneeu, en die staalstaaf binne die sool en die bonkige knoppe daaronder laat jou op enige terrein toe. R2 000 by Sportsman’s Warehouse

LK’SVUURAANSTEKERS

Met dik handskoene is dit moeilik om ’n vuurhoutjie te trek of ’n Bic-sigaretaansteker te gebruik. Met hierdie langloop-aanstekers met snellerskakelaars is dit verspotmaklik. R40 by Spar

ZIPPO-HANDVERWARMER

Hierdie werk amper soos die gelyknamige sigaretaansteker, maar daar is nie ’n oop vlam wat jou klere aan die brand sal steek nie. Dis warm genoeg om deur handskoene te voel, maar nie só warm dat dit kaal vel sal skroei nie. R565 by mentality.co.za