Speel jouself slimmer
Verbeel jou jy is weer ’n laerskoolkind, maar dié keer kry jy nooit, ooit huiswerk nie. Jou skooldag is net drie of vier uur lank (pouse ingesluit) en jou hele skoolweek mag nie langer as 20 uur wees nie, want jou onderwysers wil hê jy moet eerder buite speel en in die natuur gaan stap. En pleks daarvan dat jou punte in die hek duik, is jy en jou skoolmaats van die beste presteerders ter wêreld in wiskunde, wetenskap en geletterdheid!
Dit klink soos Utopia, maar dis eintlik hoe dinge in Finland werk. Dié Skandinawiese land se onderwysstelsel is 40 jaar gelede as een van die vrotste onderwysstelsels in die Westerse wêreld gereken, maar word nou een van die bestes genoem. Ek kyk die anderdag ’n dokumentêre rolprent van die Amerikaanse filmregisseur Michael Moore, Where to Invade Next. Hy probeer onder meer vasstel hoekom die Finse skoolstelsel so goed werk.
Finland doen byvoorbeeld goed soos om die top 10% van die land se gegradueerdes as onderwysers te werf. Daar is ook nie iets soos “goeie” of “slegte” of selfs private skole nie – alle skole is ewe goed. Omdat onderwys gratis is, wys die staat dieselfde hulpbronne aan elke skool toe.
Maar die een ding wat my veral opgeval het, is toe Moore ’n onderwyser uitvra oor die kort skoolure en geenhuiswerkbeleid. “As jy heeltyd net werk, werk, werk, hou jy op met leer. Jou brein moet kan ontspan. Die doelwit is om ons kinders te leer om gelukkig te wees,” sê sy.
Dit het my aan hierdie uitgawe van Weg laat dink. ’n Mens kan maklik verstrengel raak in werk, werk, werk, en dan dink jy moet ver weg gaan en baie geld bestee om te ontspan. Maar dis nie waar nie. Regoor ons land is die wonderlikste nasionale parke, baie van hulle net ’n hanetree van ons huis af, waar ons binne ’n dag weer ons koppe kan oopspoel.
Nes die Finse skole, is toegang tot van ons gunsteling- nasionale parke (bl. 32) gratis vir ’n week in Erfenismaand. Gebruik die kans en gaan speel buite in die natuur. En kom ons glo die Finne... dit gaan jou nie net gelukkiger maak nie, maar slimmer ook!