Ekspedisie Wortelkoek ’n sukses!

Die TV-reeks Weg Agterpaaie Karoo het ons oortuig om in April in die Karoo te gaan vakansie hou. Ons het ook op die program gehoor van Fox Ledeboer, die bestuurder van die Gamkapoortdam Cottages naby Calitzdorp, wat smag na ’n wortelkoek.

Ek moes wortelkoeke saamneem vir vriende in George en dink toe ons kan net sowel l vir Fox ook k een vat.

Met die wortelkoeke veilig verpak in yshouers in die koelboks, vertrek ons na Prins Albert. Drie dae later takel ons die roete na die Gamkaskloofdam deur Meiringspoort en Seweweekspoort.

Aan die ander kant van Seweweekspoort raak die pad ál nouer sodat net een voertuig teen die rand van die berg kan ry. Aan die bestuurderskant het die afgrond al hoe hoër geword – en ek en my skoonma, Joekie (86), ál banger. Plek-plek moes ons byna op die rotswand ry, want die pad het óf verspoel óf was uitgetrap. Behalwe vir die hoogtes het dit gevoel asof ons by die verlatenheid inry. Hoë berge het rondom ons uitgetroon en ek het gewonder wat sal gebeur as ’n mens hier teëspoed kry...

Groot was ons verbasing om te sien dat daar nog lewe op dié verlate stuk aarde is. Ons het verby die Bosluyskloof Lodge en nog ’n klompie huisies gery. Later by die dam het alles verlate en stil gelyk. Daar was ’n paar huisies waar Waterwese se personeel seker lank gelede gebly het.

Terwyl ons staan en rondkyk, kom Fox aangestap met ‘n oogklap aan. Hy was vreeslik beïndruk met sy wortelkoek. “Don’t drop my cake,” het hy herhaaldelik gesê. Hy het vertel dat mense steeds vir hom ’n Engelse koerant, vars brood en melk bring na aanleiding van ’n vorige artikel. Tot ons verbasing durf hy die pad aan in ’n 1400 Nissan-bakkie! Die wortelkoek-ekspedisie was senutergend. Ons sal nie weer so iets aanpak sonder om die roete deeglik te bestudeer nie. Maar ondanks die hoogtes en ongelyke pad was dit die moeite werd!