5 DINGE WAT JY MÓÉT SIEN IN AFRIKA!

Weg het onlangs ’n epiese Afrika-reis in ’n Toyota Fortuner onderneem waarop ons binne 90 dae oor 6 landsgrense en byna 17 000 km gery het. Hier is ons lys van 5 ikoniese plekke wat jy móét besoek.

Ry Dar es Salaam toe. Tanzanië se grootste stad is binne maklike bereik van Suid-Afrika – dis heelpad teerpad! ’n Reis soontoe en terug is een van Afrika se beste selfrytoere. Doen aan by reservate soos Ruaha en Mikumi padlangs, en reis dan met die veerboot na Zanzibar vir ’n paar dae!

Vergaap jou aan Kilimandjaro. Nee, jy hoef hom nie te klim nie – maar sién die berg! Afrika se hoogste is in die noorde van Tanzanië, en padlangs kan jy fantastiese nasionale parke soos Mkomazi, Arusha en Tarangire besoek. Raak wild in Ngorongoro en Serengeti. Twee van Afrika se grootste wildernisse, en rég langs mekaar! Leeus, luiperds en jagluiperds dat dit by jou ore uitkom. Wildebeeste in hulle duisende. Daardie klassieke sonsondergang oor die savanneveld. Dis als hier.

Ry Rwanda plat. Hierdie piepklein landjie kan jy sommer op een tenk brandstof verken – gaan kyk berggorillas, goue ape en skaars voëlspesies, en span uit langs die mooie Kivumeer en in die Nyungwewoud.

Vrugtevlermuise op steroïede! Zambië se Kasanka- nasionale park is tussen Oktober en Desember elke jaar die tuiste van tot 15 miljoen vrugtevlermuise!