3 Kamdeboo- nasionale park

GRAAFF-REINET

Doer onder jou lê die Vallei van Verlatenheid tot op die horison, onpeilbaar ver... Rondom en langs jou troon dramatiese pilare en klipstapels tot 120 m bo die vlaktes uit. Jy trek ’n diep teug Karoolug in.

Maar wag, ek loop dinge vooruit. Jy sluit eintlik ’n perfekte dag in dié park hier af. Kom ons begin by die begin – sorg dat jy om 6.30 vm. by die hoofhek, wat afdraai van die N9 (rigting Middelburg), stilhou.

Die park lê rondom Graaff-Reinet met ’n paar ingangshekke. Kry by die ontvangskantoor (by die hoofhek) ’n sleutel vir die Kroonvale-hek in die oostelike deel van die park. Ry soontoe en volg die Driekoppe-4x4-roete. Jy kan die roete ook in ’n 4x2 aandurf, maar in die reënseisoen gaan jy ’n voertuig met ’n hoë grondvryhoogte nodig hê.

Hou jou oë oop vir bergsebras, ribbokke en klipspringers op pad na die Waaihoekpiekniekkol, waar jy ’n puik uitsig oor die Kamdeboo se vlaktes het. Gooi by Waaihoek ’n geruite tafeldoek oor ’n piekniektafel en pak die warmfles en toebroodjies uit.

Ry hiervandaan af met Diepkloof en verlaat die park by die Lootsfonteinhek.

Die park het nie ’n restaurant nie, maar jy moet in elk geval deur Graaff-Reinet ry. Hou stil by die Polkarestaurant ( 087 550 1363; polkacafe.co.za) en lê weg aan heerlike lamskotelette met aartappelskyfies en groente (R125).

Ry nou weer die park by die hoofingang binne. (Onthou om die Kroonvale-sleutel in te handig!) Hou verby die granietstandbeeld van die Voortrekker Andries Pretorius en verken die netwerk van wildkykpaaie van sowat 20 km. Jy ry ook oos van die Nqwebadam in die park – kyk of jy grootflaminke of ’n sekretarisvoël met sy koddige stappie te siene kry. Hier is nie roofdiere in die park nie, maar jy sal waarskynlik foto’s van buffels, gemsbokke, elande, springbokke en rooihartbeeste op jou Instagram-profiel kan laai.

Sorg dat jy teen 4 nm. na die Vallei van Verlatenheid mik. Dié hek lê 5 km buite die dorp langs die R63 in Murraysburg se rigting. Ry 9 km al langs die kronkelende pad tot by die parkeerterrein en stap die maklike Crag Lizard-roete (1,5 km) tot by die uitkykpunt. Hierlangs is verskeie uitkykpunte waar jy die dolerietpilare wat reeds 100 miljoen jaar gelede gevorm het, kan aanskou terwyl die son sak. Gaan sit rustig op ’n klip en hoor hoe die stiltes van die Kamdeboo met jou praat. Hoe kom ek daar? Die park is buite Graaff-Reinet en 251 km van Port Elizabeth af. Tye 6.30 vm. tot 7 nm. Koste R35 per volwassenes, R17 per kind; gratis met ’n Wild Card of van 18-24 September. Kontak 049 892 3453