5 Tuinroete- nasionale park (Tsitsikamma-deel)
TUINROETE
Die Tsitsikamma is een van die mooiste kusstroke ter wêreld, en ná die onlangse verwoestende brande het dié streek jou ondersteuning nodig.
Staan sommer al teen oopmaaktyd (7 vm.) voor die hek. Volg die teerpad na die onderste parkeerterrein. Moenie jaag nie – hier is dikwels bokkies op die pad. Ry verby die netjiese staanplekke vir tente en woonwaens en die houthutte. Dagbesoekers parkeer in ’n ruim parkeerterrein op die verste punt van die reservaat.
Net langs die parkeerterrein is ’n yslike markiestent waarin die Cattle Baron-restaurant tydelik gehuisves word nadat sy perseel hoër op teen die berg in ’n brand beskadig is.
Hier kan jy jou dag rég begin: met ’n spek-en-eierontbyt (vanaf R29) en boeretroos wat in ’n blikbeker voorgesit word. In goeie weer word die een sy van die tent afgeslaan en sien jy die branders skaars 50 m van jou tafel af ontplof.
Die branders “klots” en “breek” mos nie in hierdie geweste nie – hier slaan die golwe soos kanonvuur teen die rotse vas dat die wit skuim soos ’n vuurwerkvertoning die lug inskiet.
As jy laaste voorraad nodig het, kan jy koeldranke en peuselgoed by die winkel oorkant die restaurant kry. En dan lê ’n hele dag se stap op een van die talle dagstaproetes voor. Die langste roetes hier is die Keurpad- (15 km) en Watervalroete (6 km), wat die eerste deeltjie van die Otterwandelpad volg.
Maar wie wil nou sweet? Mik ná ontbyt vir die plankiespad (1 km) na die Stormsrivier-hangbrug. Houtbankies staan in skadukolle langs die pad wat jy stap saam met kleuters in sandale, senior burgers, verliefdes...
In die namiddag kan jy die Loerieroete (ook ’n maklike 1 km) deur digte woud stap. Gaan sit ’n rukkie tjoepstil op een van die bankies en bespied die blaredak – die kans is goed dat jy die rooi vlerksleep van ’n Knysnaloerie of twee gewaar.
Somermaande kan jy natuurlik ook allerhande soorte waterpret hê, van kanoroei tot snorkelduik. Gaan klop hiervoor aan by Untouched Adventures ( 073 130 0689; untouchedadventures.com) se kantoortjie op die strand.
Kyk laatmiddag hoe die son oor die see sak terwyl julle julle tuismaak by een van die braaiplekke vir dagbesoekers. Wees rustig! Hoewel die hekke smiddae om 6 nm. sluit, mag dagbesoekers tot 9.30 nm. bly. Hoe kom ek daar? Draai van die N2 af (195 km van Port Elizabeth en 68 km van Plettenbergbaai af). Tye 7 vm. tot 6 nm. Koste R49 per volwassene, R24 per kind; gratis met ’n Wild Card of van 18-23 September. Kontak 042 281 1607