DAG 1 ITHALA Kies ’n paadjie deur die woud
Jou reis begin by die ITHALA-WILDRESERVAAT, waar die Ngotsheberg soos Pride Rock in The Lion King bo die horison uittroon. ’n Mens verwag eintlik dat die kameelperde binnekort “The Circle of Life” uit volle bors gaan begin sing.
Dagbesoekers betaal ’n bewaringstarief van R120 p.p. (halfprys vir kinders). Dié tarief geld egter nie as jy in die park oorbly nie.
Ithala bied verskeie soorte landskappe en plantegroei. Die beste manier om die park te sien is om ’n toebroodjie in te pak en ’n stappaadjie te kies. Die Phuzamoya-paadjie is ’n twee uur lange stap deur bosland, grasveld en ruigtes waar witkruisarende hoog bo jou kop deur die lug gly. Die Horace Rall-paadjie is ’n langer roete van 12 km (moenie in die winter ná 12 vm. begin stap nie) deur noordoostelike bergsuurveld – dis ’n skaars soort fynbos. Daar’s net 800 ha van dié habitat in die wêreld oor en jy gaan deur die helfte daarvan stap. Jy kan ook ’n begeleide staptog saam met ’n veldwagter doen teen R250 p.p., wat drankies en peuselhappies insluit (minimum twee mense, maksimum agt).
As dit diere is wat jy soek, doen ’n begeleide wildrit in ’n oop voertuig – R250 p.p. (geen kinders jonger as 12 nie). Of klim in jou eie motor: Die Ngubhu-sirkelpad is ’n 30 km lange roete met verskeie uitkykpunte. Reën bepaal of die paaie sedanvriendelik is; maak dus by die ontvangskantoor seker voordat julle in die pad val. Koel agterna af in die swembad by die NTSHONDWE-OORD, en drink koffie by die Guinea Fowl-koffiewinkel.
Ontelbare dramatiese verhale het al in Ithala se heuwels afgespeel, van goudprospekteerders tot mense wat van Sjaka weggevlug het. Leer meer hieroor in die museum by die inligtingsentrum.
Raak rustig wanneer die aand nader kruip en teug aan ’n skemerkelkie by ’n watergat naby die Kraal-restaurant, terwyl jy luister hoe nagapies die donker groet.
BLY HIER
DOORNKRAAL-KAMPTERREIN Dié kampterrein is ’n uur se ry van ontvangs af; maak dus seker jy het genoeg tyd om voor donker hier uit te kom. Hier is geen kragpunte nie en woonwaens word nie toegelaat nie – die grondpaaie kan bedrieglik wees as dit gereën het. Jy slaap hier afgesonder en sonder tierlantyntjies ( ja, met koue storte). Koste Vanaf R150 p.p. Kontak 034 983 2540;
kznwildlife.com
NTSHONDWE-OORD Dís Ithala se hoofkwartier. Hier’s verskeie selfsorgchalets met plek vir twee tot ses mense. As jy nie wil kosmaak nie, maak ’n draai by die Kraal-restaurant vir ontbyt, aandete en ’n buffetmiddagete op Sondae. Koste Vanaf R1 360 vir ’n chalet (slaapplek vir twee). Kontak 034 983 2540; kznwildlife.com