DAG 7 IMFOLOZIWILDRESERVAAT Selfry-safari
Dis ’n 90 minute lange rit van Kaap Vidal tot by iMfolozi se NYALAZIHEK (daaglikse bewaringstarief: R105 per volwassene; kinders betaal halfprys; gratis met ’n Rhino Card of ’n Wild Card).
Mik vir die EEUFEESSENTRUM binne die park en kyk na die uitstallings oor Operasie Rhino, die program wat basies die witrenoster van uitsterwing gered het. As die honger knaag, kry ’n spek-eier-en-kaasburger (R48) by die kiosk.
Volg die teerpad van die Eeufeessentrum af al by die platorand af tot in olifantland, waar troppe oor die pad stap en op die oewer van die Imfolozirivier rondmaal.
By die MPILA-OORD loop vlakvarke en rooibokke tussen die chalets rond. Bespreek plek vir ’n drie uur lange wildstap die volgende oggend met ’n veldgids (5.30 vm. in die somer; 6 vm. in die winter). Die stap kos R290 p.p. en is beperk tot agt mense. G’n kinders jonger as 12 nie.
Die roete tot by die SONTULI-PIEKNIEKPLEK aan die Swart-Imfolozirivier (GPS S28.22978 E31.84486) is ’n lekker middagrit. Hou net in gedagte dat die paaie in die noordwestelike hoekie van die park ’n bietjie hoërgraad kan wees vir tweewielaangedrewe voertuie.
BLY HIER
MPILA-OORD ’n Rustige plek met groepies lodges, huisies en safaritente met slaapplek vir twee tot agt mense. Die oord kyk van bo-op ’n heuwel in die rigting van die Imfolozirivier. Hier’s nie kampplek nie. Koste Safaritent: R1 000 p.n. (slaapplek vir 2). Chalet: vanaf R1000 (slaapplek vir 2 mense) tot R2 500 (slaapplek vir 5 mense). Kontak 035 550 8476; kznwildlife.com