DAG 8 HLUHLUWE Kuier by die bure
Hluhluwe is dalk net langsaan iMfolozi, maar die twee wildreservate verskil baie. Dis meer heuwelagtig as by iMfolozi – mooi uitsigte is dus gewaarborg. As jy nie lus is om al jou goed te skuif nie, kan jy vir die dag by Hluhluwe gaan kuier via die Nyalazihek – maak net seker jy is voor 6 nm. weer terug in iMfolozi. Die ander opsie is om die nag by die HILLTOP-OORD in Hluhluwe deur te bring, of by die Hluhluwe Backpackers net buite die Memorial-hek (sien besonderhede hieronder).
Vat ’n breuk van julle wildrit en braai wors by die SIWASAMAKHOSIKAZI-PIEKNIEKPLEK op ’n kurwe van die Hluhluwerivier (GPS S28.13872 E32.02000; hier is toilette). Volg dan die teerpad tot by die Hilltop-oord. As jy nie oorbly nie, rek jou bene met ’n tien minute lange stappie deur die woud, wat by die swembad begin.
Ry die middag ooswaarts in die rigting van die MEMORIAL-HEK, tot in ’n laerliggende gebied met die naam Magangeni, waar jy troppe uitbundige buffels behoort te sien. Ry van die hek af weer terug na die Magwanxa-gebied (3,2 km weg) en vat die sirkelgrondpad tot by die Isivivaneni-gebied via die Maphumulopiekniekplek (GPS S28.11822 E32.10206).
Die sirkelpad is doenbaar met ’n gesinsmotor. Dit loop langs die Hluhluwerivier tot dit weer by Isivaveni by die teerpad aansluit. Ry van hier af terug tot by jou gekose blyplek. As ’n trop wildkykvoertuie vol oorsese toeriste iewers langs die pad jou uitsig belemmer, wees net geduldig – hopelik is hulle twee selfies later weg.
BLY HIER
HILLTOP-OORD ’n Groot ruskamp by een van die hoë punte in Hluhluwe. Kies tussen selfsorgverblyf of verblyf wat alle etes insluit. Hier’s ’n swembad, klimraam en ’n restaurant. G’n kampplek nie. Koste Rondawel met slaapplek vir twee en ’n gemeenskaplike badkamer en kombuis: vanaf R920 p.n. Selfsorgchalet met slaapplek vir twee: vanaf R1 740 p.n. Kontak 035 562 0848; kznwildlife.com
HLUHLUWE BACKPACKERS ’n Ontspanne atmosfeer met basiese private kamers en slaapsale, net 2 km van Hluhluwe se Memorial-hek af. Koste ’n Dubbelkamer met ’n gemeenskaplike badkamer en kombuis: vanaf R520 p.n. Kontak 076 375 3831; hlubackpack.co.za