DAG 9 DUNDEE ’n Reis deur tyd
Jou geskiedenisles begin as jy by iMfolozi se CENGENIHEK uitry na Ulundi en verder na Dundee, die poort na Zoeloeland se slagveldgedenkplekke.
Vat sowat 25 km voor Dundee die Dejagersdrift-afdraai van die R33 af en volg die grondpad tot by die BLOEDRIVIERGEDENKTERREIN. Dis waar die Voortrekkers in 1838 teen die Zoeloeleër geveg het. (Toegang R40 per volwassene; R25 per kind; plus R20 per voertuig).
Kyk by die besoekersentrum na ’n video oor die veldslag, en stap dan na die lewensgroot laer van verbronsde waens. Jy kry ’n kaart waarmee julle die plekke rondom die slagveld kan verken. En moenie loop sonder om die legendariese maalvleisvetkoek (R50 p.p.) by die Trekker Kitchen te bestel nie. Bespreek vooraf as julle meer as 10 mense is.
Ry ná Bloedrivier aan met die R33 (met sy ooraanbod spoedhobbels) tot in Dundee. Ry deur die dorp en hou sowat 40 km aan, draai dan links op ’n grondpad wat by ’n vallei afdaal tot in die hartjie van Zoeloeland. Die pad vat jou na ELANDSHEIM RETREAT, ’n lekker basis van waar julle na die RORKE’S DRIFTen ISANDLWANA-SLAGVELD ’n entjie verder kan gaan kyk.
Vra Elandsheim se bestuurder, Kristie Payne, om jou te verwys na ’n slagveldkenner wat julle kan rondwys, afhangend van wat julle wil sien (’n dagtoer kos R1 500-R3 000 per groep). Of kry ’n gedetailleerde kaart (R3) by haar as jy verkies om jou eie gids te wees. (Toegang tot Rorke’s Drift en Isandlwana: R35 per volwassene by elke plek; R20 per kind.)
As julle weer terug is by Elandsheim, kan die kinders op ’n foefieslaaid (R120 p.p.) uiting gee aan al die energie wat hulle in die motor sit en opgaar het, of julle kan mik vir die boogskietbaan (R65 p.p vir volwassenes). Hier is ook heelwat stappaadjies in die omliggende reservate.
Voordat julle Dundee verlaat, hou by die TALANA-MUSEUM stil vir nog slagveldgeskiedenis, asook ’n blik op die lewe in hierdie boerdery- en mynboudorp. Pam McFadden is die entoesiastiese kurator (toegangstarief: R30,20 per volwassene; R2,40 per kind).
BLY HIER
BATTLEFIELDS-WOONWAPARK Dié woonwapark is op Menteith Farm buite Dundee, na aan die afdraai na Bloedrivier. Die kampterrein het skoon ablusie- en kombuisgeriewe, ’n lapa, trampolien en swembad. Koste R170 p.n. per woonwa of tent vir vier mense. Kontak 034 632 1723
BLOEDRIVIERGEDENKTERREIN Hier’s driesterverblyf in en suite-kamers en lekker boerekos by die Trekker Kitchen-restaurant. Hier is ook braaiplekke. Koste R350 p.p. wat deel in gastehuis; R250 per kind. Dit sluit ontbyt in. Kampe: R200 vir vier mense. Matrasse kan voorsien word as jy graag in ’n ossewa wil slaap... (R150 p.p.; eie beddegoed). Kontak 087 985 1884; bloedrivier.org.za
ELANDSHEIM RETREAT Hierdie vreedsame plek is 55 km van Dundee af, omring deur private wildreservate. Gaan kyk na die Lutherse kerk van sandsteen wat in 1921 op die plaas gebou is. Koste Dubbelkamer met gemeenskaplike badkamer: vanaf R350 p.p. wat deel (elke kamer het ’n braaiplek); R550 met aandete en ontbyt ingesluit. Hier’s ook ’n hut met en suite-slaapkamers en slaapplek vir agt mense: vanaf R240 p.p. Groter groepe kan ’n kombuisruimte huur, asook ’n lapa wat een keer per dag skoongemaak word. Kontak 072 819 5686; elandsheim.co.za >