DAG 10 NORMANDIEN Vat dit rustig
’n Mens kan nie die Zoeloekoninkryk verken sonder om die vars lug van die Drakensberg in te asem of in die verfrissende riviere te swem nie. Mik dus vir MOORFIELD MOUNTAIN FARM, sowat 90 km van Dundee af.
Dié gasteplaas is bo-op Mullerspas geleë en grens aan die Ncandu-natuurreservaat. Borrelende sytakke van die Ncandurivier vloei verby die huise. Jy’t nou genoeg rondgery en toeris gespeel: Dié is die ideale plek om jou vakansie af te sluit – met ’n boek onder die boom en ’n wandeling elke nou en dan.
En jy gaan sukkel om beter stappaadjies te kry: Een vat jou van hooglandvlaktes tot in ’n kloof met ’n hele skare oeroue geelhoutbome. Nog een loop deur woude waaroor baardmos gedrapeer is na ’n skouspelagtige waterval. Grasveld én ’n beboste kloof... voëlkykers sal weer en weer wil kom kuier. Jy kan vooraf reël om te abseil (R250 p.p.) of ’n begeleide perderit te doen (R100 per uur).
Steek later die aand – ná ’n laaste verfrissende plons in ’n rivierpoel hier naby – ’n braaivleisvuur aan terwyl die son agter die berg verdwyn en die mooiste sterrehemel van jou vakansie geleidelik bo jou oopvou.
BLY HIER
MOORFIELD MOUNTAIN FARM Verblyfopsies sluit in die Tin House met slaapplek vir nege (dis in die 1890’s deur ’n landmeter gebou met sink en hout wat uit Kanada verskeep is); ’n grasdakrondawel met slaapplek vir twee mense (foto links) of backpackerverblyf. Koste Tin House: R1 700 p.n. Rondawel: R700 p.n. Backpacker-opsies vanaf R600 p.n. vir ’n kamer met vier beddens (bring jou eie beddegoed en handdoeke). Afslag beskikbaar as jy langer as een nag bly. Kontak 082 328 3819; moorfield.co.za