JIM RANKIN

van Edenvale skryf: Die bosbok het aan ’n boom by die Makhadzi-piekniekplek in die Krugerwildtuin gehang. Die opsigter het gesê dis bobbejane wat die bosbok doodgemaak en gehang het. Is dit iets wat algemeen voorkom?

Die wildlewekenner L.D. VAN ESSEN antwoord: Bobbejane is opportunistiese omnivore wat hoofsaaklik vrugte, saad, gras en swamme vreet. Hulle vreet ook insekte en kleiner gewerwelde diere en langs die kus skulpvis en ongewerwelde seediere. Bobbejane sal lammers van verskeie boksoorte, onder meer rooi- en bosbok, vang en vreet – gaan kyk gerus na video’s op YouTube. In sekere boerderygebiede veroorsaak bobbejane groot skade waar hulle skaaplammers vang en vreet. In baie gevalle vreet hulle net die melkpens en los die res.