WILLEM PIETERSEN
@willempietersen_0306 Canon 550D Canon 18-55 mm-lens
WILLEM VERTEL: Ons was in die Moremi-wildreservaat in Botswana op pad Khwai toe. Een van ons Cruisers het vasgeval en om dinge erger te maak het ’n swaar donderbui uitgesak. Met ons eerste probeerslag om die voertuig uit te pluk het die kinetiese tou gebreek.
Ek was deel van die Kalahari Vasbyt-toergroep – dit is ’n leierskapkursus vir jong seuns van regoor Suid-Afrika. Met die jongklomp se deursettingsvermoë het hulle die Cruiser en koswaentjie uit die modder gekry. TOAST SÊ: Sjoe, ja, in die laatsomer van 2017 het groot dele van Botswana baie reën gehad. Die meeste ouens sou by die huis gebly het, maar Willem en die seuns het kans gesien...
Ek hou van hierdie foto omdat dit ’n storie vertel. ’n Foto hoef nie altyd net “mooi” te wees nie. Foto’s is in die eerste plek iets wat ’n oomblik dokumenteer. Dit word ’n rekord van die geskiedenis: Dink maar aan foto’s van D-dag tydens die Tweede Wêreldoorlog, of die eerste maanlanding, of Madiba en François Pienaar saam met die Wêreldbekerrugbytoernooi in 1995.
Willem se foto dokumenteer dalk nie só ’n groot oomblik in die geskiedenis nie, maar wanneer hierdie groep jong mans dalk oor ’n dekade hierna kyk, sal dit iets in hulle wakker maak: Wie hulle destyds was, en dalk hoe hulle gegroei het as mense op hierdie Botswanavakansie waar hulle so erg vasgesit het.
Hoe neem jy foto’s in die reën? Probeer jou kamera droog hou – sit binne-in die kar, draai gou die ruit af en neem ’n paar foto’s.
Stel jou ISO op 400 of selfs 800. Wanneer dit reën, het jy gewoonlik minder direkte sonlig en word die toneel donkerder.
Deur jou ISO hoër te stel verhoog jy die ligsensitiwiteit van jou kamera se sensor, en dit behoort beter resultate te gee sonder dat jou sluiterspoed te stadig word.