VAT ’N LA-A-ANG BREUK

Kliphotel Country Store

Hierdie ou hotel het sedert Augustus 2016 nuwe eienaars. Andrew en Sarah Jordaan het uit Stellenbosch na die Langkloof getrek. Andrew is ’n sjef – verwag dus heerlike etes! As jy op ’n Sondag hier verby ry, hou stil vir middagete (R100-R130 p.p.). Waar? Langs die R62 tussen Misgund en Haarlem. Kontak 042 275 1061;

kliphotel.co.za

Kontrei Kombuis

Hierdie restaurantjie is weggesteek agter ’n ou treinstasie in Louterwater. Die kerrievetkoek (R20) is gewild in dié gebied – maak seker jy proe een! Waar? Hoofstraat, Louterwater. Kontak 083 441 8639 (Veronel)

Joub’s

Hier’s ’n paar goeie opsies in die sentrumpie: Sit aan vir ’n ete by Diner R62, snuffel deur die padstalgoedere by die Appelkas of koop wyn by Winery R62. Waar? Langs die R62 in Joubertina. Kontak 042 273 1031

Die Kraaltjie

Ligte etes word vinnig teen goeie pryse berei: Kry ’n wildspastei en skyfies vir R45 terwyl die kinders op die trekker en klimraam speel. Waar? Sowat ’n kilometer buite Joubertina op pad na Uniondale. Kontak 042 273 1516

Die Plaaswerf

Hier’s ’n groot tuin vol ou trekkers vir die kinders; en binne is ’n yslike kaggel en ’n gesellige kroegtoonbank. Die lamstjoppies (R82) is heerlik. Waar? Langs die R62, net buite Kareedouw op pad na Uniondale. Kontak 042 288 0262

Altelekker

Drink ’n yskoue bier of bestel ’n ligte middagete soos ’n roosterkoek met kaas en konfyt (R15). Jy kan selfs jou hare by dié koffiewinkel laat sny. Waar? Van Riebeeckstraat 15, Kareedouw. Kontak 042 288 0748

The Sweaty Dutchman

Hulle spesialiteit is pannekoeke. Probeer een met gestoofde kersies, roomys en room (R52) terwyl die kinders op die klimraam speel. Waar? Langs die R62 in Kareedouw Kontak 042 288 0056