Mtentu is tops

Ek is bevoorreg om drie wonderlike reismaats te hê: My vriendin Elize, haar dogter Claudelle en my dogter, Helena.

Ons het die afgelope twee Junievakansies na die Wildekus getoer. Ons vier is gaande oor watervalle en ry draaie om watervalle te besoek. Verlede jaar het ons die Tsitsa-, Magwa-, Angel-, Frere- en Waterfall Bluff-waterval besoek.

Hierdie jaar het ons gebly in die Mtentu Lodge, sowat 50 km suid van Port Edward ( mtentulodge.co.za). Dis nie maklik om daar uit te kom nie, maar die moeite werd. Ons het heerlik gekuier en die Mtenturivier met kano’s verken om nog drie watervalle te besoek – die Swallow’s Tail-waterval was ’n hoogtepunt.

Allan en Elena Hein doen wondere om die lodge reg te ruk. Die kos is uit die boonste rak en die safaritente het ’n mooi uitsig oor die see en riviermonding.

ANNAMARI ANNANDALE,