WIELE
Audi glo duidelik diesel is nie ’n vloekwoord nie. Met die nuwe Q5 kan jy met een tenk van die Kaap af amper tot in Gauteng ry. Dít wil gedoen wees, skryf Braam Peens.
Met die nuwe Audi Q5 kan jy van die Kaap af ámper tot in Gauteng ry. Braam Peens loer onder dié tweedegeslag-Q5 se enjinkap
Onthou jy 2015 se dieselskandaal? Die keer toe die Volkswagengroep se geknoei oor diesel-uitlaatgasse hom meer as R22 miljard aan boetes laat hoes en daarmee saam onmeetbare skade aan sy beeld berokken het?
Koppe het soos tolbosse gerol en elke nuwe diesel-Volkswagen en -Audi het oornag in Amerika – waar die storm losgebars het – uit handelaars se vertoonlokale “verdwyn”. Dat die Oxford-woordeboek nie die d-woord aangewys het as die aanstootlikste woord van daai jaar nie, bly ’n wonderwerk. Maar geen salf is sterker as Vader Tyd s’n nie; daarom was Audi dapper genoeg om die intreeweergawe van sy nuwe, tweedegeslag-Q5 weer met ’n dieselenjin toe te rus.
En weet jy wat? Die Kaap is weer Hollands – onder die Audi se enjinkap, maar veral in sy kajuit.
Die nuwe Q5 is groter, ligter, slimmer en suiniger met brandstof as tevore; ongelukkig duurder ook. Hy moet sy storie ken, want hy ding mee met strawwe sagteviertrekmodelle, soos die Mercedes GLC, Jaguar F-Pace, Land Rover Discovery Sport en die Volvo XC60.
Anders as die Discovery is die Q5 groot (4,66 m lank en 1,89 m breed) genoeg vir vyf volwassenes maar ook net-net te klein vir ’n derde ry sitplekke. Maar – kort van ’n Rolls-Royce – kry jy wel die beste en stilste binneruim op die mark. Die Q5 beywer hom vir topklasveiligheid (hy kan byvoorbeeld vanself ’n noodstop uitvoer as hy ’n voetganger in die pad bespeur), hy het aanboordvermaak (spesifieke selfone kan koordloos gelaai word) en internetkoppeling (tot agt toestelle kan tegelyk gekoppel word).
Audi beweer hierdie tweeliterQ5 kan 1 327 km met een tenk ry. Dis volgens Google Maps net 69,5 km te kort as jy van die Goudstad af Kaap toe ry. ( Bring ’n fiets saam vir daai laaste ent. – Red.)
Die Q5 is te koop met ’n tweeof drieliterpetrolenjin, maar vir langpadryers bly die dieselenjin die slimste keuse.
Soms kom goed uit die kwaad – knap gedaan, Audi.