Afrika se beste voetjie voor
Die kompetisie Nature’s Best Photography Africa (NBP Africa) is ’n viering van natuurfotografie reg oor die vasteland. In 2017 het die derde aflewering van dié kompetisie ’n rekordgetal inskrywings gelok: 17 000 – dis 92% meer as die vorige jaar! Die Suid-Afrikaners Brendon Cremer en Geo Cloete het die toppryse verower. Brendon het die toekenning Afrikanatuurfotograaf van die Jaar gewen vir sy portefeulje, wat die pragfoto van ’n rooiborsbyvreters met sonsondergang op bl. 72 ingesluit het. Geo Cloete se foto van boksjellievisse wat optol na die see-oppervlak (bl. 75) het Foto van die Jaar gewen.
Die kompetisie word aangebied in samewerking met Izikomuseums, en die wenfoto’s is van November 2017 tot Maart 2018 by die Suid-Afrika-museum in Kaapstad ten toon gestel.
“Die doel van die kompetisie is om deur fotografie en opvoeding ’n liefde vir Afrika se natuurlike hulpbronne te kweek en mense aan te moedig om dit te beskerm,” sê die hoof van NBP Africa, Craig Mark.
Pryse sluit in: fotografiesafari’s na die Masai Mara- nasionale natuurreservaat in Kenia, die Serengeti in Tanzanië en die Chobe- nasionale park in Botswana. ’n Gekombineerde uitstalling van die Afrika-kompetisie en sy internasionale niggie – die kompetisie Nature’s Best Photography-kompetisie – word tot September vanjaar in die Smithsonian in Washington DC ten toon gestel.
SAAMGESTEL DEUR
Lus om in te skryf vir die 2018-kompetisie? Gaan kyk op die webwerf naturesbestphotographyafrica.com