FOTOPORTEFEULJE
Kom ry saam met Liesel Kershoff deur die mooie Overberg... hier is enigiets van vuurtorings en windturbines tot ’n leë dam
Die landskapfotograaf Liesel Kershoff is op Caledon, sowat 100 km van Kaapstad af in die hartjie van die Overberg, gebore en het daar grootgeword. Sy bly vandag nog daar, omring deur skilderagtige canolalanderye wat geel in die blom staan terwyl windturbines lui-lui in die rondte tol.
“Boerdery is altyd ’n gespreksonderwerp op die dorp,” vertel Liesel. “Hoe gaan dit met die gewasse? Hoe lyk die oes dié jaar?”
Sy sou dalk self in die landboubedryf beland het, as sy nie op 33 besluit het om haar loopbaanpaadjie te verander nie. Sy het eers beplan om op wildfotografie te fokus, maar haar onmiddellike omgewing het haar soveel inspirasie gegee dat sy toe eerder landskapfotografie gekies het.
Die resultate is dalk betowerend, maar om die foto te kry vereis baie vroeë oggende en laat aande, en baie ure se wag vir daai “soet lig” met haar lyfwag, Rommel, die Rottweiler, aan haar sy.
“Die Overberg sal nooit ophou om my te verstom nie,” sê Liesel. “Die groen golwende heuwels in die winter, wanneer mis in die vallei saambondel, of die droë somermaande wanneer alles monochromaties voel ná die oes. Die landskap vrá jou aandag, soos ’n ervare supermodel.”