PIERRE SE BRIEF
Ek is net-net ’n paar jaar te jonk om te onthou waar ek op Vrydag 22 November 1963 was toe John F. Kennedy in Dallas, Texas, doodgeskiet is. Maar gesels jy met Amerikaners ouer as 65, sal hulle vir jou presies kan sê waar hulle was en wat hulle gedoen het toe hulle die nuus gehoor het.
Daar is nog sulke geskiedkundige oomblikke: Prinses Diana se dood op 31 Augustus 1997 in Parys, of die terreuraanvalle op die World Trade Center in New York op 11 September 2001. Mense trek soms los met: “Ek was besig met sus of so... waar was jy?”
Dis egter nie net donker nuus wat mense onthou nie. In my geval slaan groot sportoomblikke ook vas in die geheue: Gerrie Coetzee wat op 24 Junie 1979 vir Leon Spinks binne die eerste twee minute van die eerste rondte katswink slaan (ek het nog nie eens kans gehad om my beskuit in my koffie te doop nie). Die Aussie-kolwer Cameron Bancroft wat op 24 Maart 2018 op Nuweland op die grootskerm met sy hand in sy broek betrap word (’n mens moet jou nie in ander se teëspoed verlustig nie, maar my Castle Lager het daai middag besonders lekker gesmaak). En natuurlik die groot oomblik op 24 Junie 1995 toe Joel Stransky op Ellispark sy skepskop oorklits en die Springbokke teen die magtige All Blacks hulle eerste Wêreldbekerrugbytoernooi wen. Ek en my vrou was op vakansie in die Natalse Middeland, in ’n chalet by Midlands Saddle and Trout naby Mooirivier. Ons het langs ’n knetterende kaggel op die rusbank voor die televisie gelê en ons hees gegil.
Ek’s bly om te sien Saddle and Trout is nou – 23 jaar later – steeds aan die gang (lees op bl. 44). Die Middelland van my geboorteprovinsie bly een van my gunstelingplekke om te kuier, en dis nie net oor ek die Springbokke daar sien wen het nie. Ek hoop elkeen van julle het ’n plekkie wat julle met goeie herinneringe vereenselwig…