KOBUS VAN DEN BERG
van Nigel skryf: Dié foto is in my dogter se tuin geneem. Is die goeters giftig, aangesien hulle ’n dogtertjie het wat daaraan sal wil vat, en dalk selfs een wil eet.
Die insekkenner DUNCAN MACFADYEN antwoord: Dis wasdopluise van die Coccidaefamilie. Dit lyk soos ’n bolletjie gesmelte was met bruinpienk strepe. Die nimfe is plat en ovaal met die kenmerkende skubbe.
Die nimfe leef vir sowat ’n jaar op blare en beweeg dan na takke waar hulle die res van hulle lewe deurbring. Hulle suig plantsappe uit met hulle lang, dun monddele. Hulle val die blare, takke en stingels van gasheerplante aan. Die dopluise beïnvloed die lewenskragtigheid en groei van die plant, maar rig nie langtermynskade aan nie. Soms vorm swart skimmel rondom die besmette deel. Hulle hou veral op sitrusbome en ek sien hulle gereeld op die vetplante in my tuin. Hulle is nie giftig nie, maar proe beslis nie soos jellielekkers nie!
CARMEN STUART van Johannesburg skryf: Ek het dié bidsprinkaan gewaar wat ’n by vreet. Ek is egter nuuskierig oor die vliegies op die by en die bidsprinkaan. Ek het al gelees van vlieë wat op bye paratiseer – is dit wat hier gebeur?
Die insekkenner DUNCAN MACFADYEN antwoord: Carmen is heeltemal reg. Die bidsprinkaan vreet ’n heuningby. Die vlieë word jakkalsvlieë genoem en vreet die “bloed” van die by. Daar is nie volledige inligting oor die vlieë nie, maar hulle word beskou as kleptoparasiete van roofinsekte.
Die vlieë aas op die sappe van die prooi van bidsprinkane, spinnekoppe, perdebye en roofvlieë. Hulle is die jakkalse van die insekwêreld.