AGTER DIE SKERMS
Die uitvoerende hoof van Deep VR, Ulrico Grech-Cumbo, beantwoord ’n paar vrae oor fliek Exodus: The Great Migration.
Hoekom het julle juis die wildebeesmigrasie gekies? Die fliek is ’n groot eksperiment: Ons probeer uitvind watter toekoms daar vir dié formaat is en hoe ’n mens daaruit geld kan maak. Ons wou eerste wees om te eksperimenteer met opwindende materiaal – daar is niemand anders wat op die oomblik ordentlike natuurleweflieks in VR maak nie.
Wat is die grootste verskil tussen videomateriaal skiet vir ’n gewone dokumentêre prent en een wat in VR gemaak word? VR het nie ’n raampie nie; dus neem dit in alle rigtings af, terwyl ’n gewone dokumentêre prent ’n raampie rondom die aksie het. Daarom kan sulke flieks met zoemlense van byvoorbeeld agterop wildkykvoertuie geskiet word, terwyl ons die kamera ín die aksie moet sit (voor die aksie gebeur!) om bruikbare materiaal te kry.
Watter uitdagings was daar met die maak van die fliek? Ons wou veral graag die rivierkruisings afneem omdat dit gewoonlik die gevaarlikste deel van die migrasie is – maar die Mararivier strek basies oor die hele suidelike deel van die Mara-driehoek in Kenia, en dit was dus moeilik om te voorspel waar hulle gaan oorsteek.
Die tye was net so moeilik om te bepaal – ons moes ons kameras vooraf opstel en dan hoop op die beste.
Ons het ons bes gedoen om die kameras te kamoefleer en by die natuurlike omgewing te laat inpas, maar om goeie materiaal af te neem moet dit sigbaar wees.
Die diere sou dikwels tot op die oewer kom, die kameras sien, en net daar staan en vir die rivier staar terwyl ons kamerabatterye al papper word!
– Suzaan Hall