AFTREK PLEK

PIET’S BILTONG SHOP, OKAHANDJA

As biltongmaak (of -eet) ’n item by die Olimpiese Winterspele was, sou Suid-Afrika en Namibië waarskynlik pal die goue en silwermedaljes gedeel het.

Jy kan dus met ’n geruste hart jou eie slagter se biltong in die republiek agterlaat wanneer jy ons gunsteling-buurland besoek, want Namibië het geen tekort aan goeie slagters, vleiswinkels of biltongstalletjies nie – en dan praat ons nou nie eens van die boere op die plase nie, want hulle is die éintlike kampioene!

Piet’s Biltong Shop (deesdae onder eienaarskap van Johan Kotze) lê op linkerhand soos jy Okahandja uitry na die noorde met die B1. Koop jou voorraad hier voor jy mik vir plekke soos die Spitzkoppe, Brandberg, Etosha of Waterberg.

Dis ’n groot winkel met vriendelike personeel en jy het ’n wye verskeidenheid droëvleis, onder meer beesdroëwors (R250/kg), beesbiltong (R299/kg) en wildsbiltong (R270,50) om van te kies. Hulle verkoop ook ’n Namibiese spesialiteit, rookvleis – R249/kg. Salami kos R169,05/kg.

Pak die kampvrieskas vol met dinge soos T-beensteaks (R120/kg), kruisskyf (R105/kg), beestong (R95/kg), varkrib (R75,60), eisbein (R56,35/kg), skaapblad (R105,60/kg) en skaaprib (R96,60/kg).

As jy honger én haastig is, kry ’n wegneemkoffie vir R20 en kies uit ’n verskeidenheid toebroodjies of ’n boereworsrol – almal kos R20.

Jy kan ook kampproviand soos ingelegde beet, slaphakskeentjies, kerrieperskes, kweperkonfyt, beskuit, koekies, wyn, bier en koeldrank hier koop. Oop Ma.-Vr. 8 vm.-5 nm.; Sa. 8 vm.-1 nm. Toe op Sondae. Die aanliggende padstal, wat ook van die biltong verkoop, is egter daagliks oop: 7 vm.- 7 nm. Kontak 00 264 62 502 265

– Toast Coetzer >