KAMBERG-NATUURRESERVAAT, UKHAHLAMBA-DRAKENSBERGPARK
Kamberg is so genoem omdat ’n nabygeleë bergrant kompleet soos ’n haan se kam lyk. Hoewel dit een van Ezemvelo KZN Wildlife se kleinste natuurreservate is, is die rustigheid gróót.
Kies uit verskeie dagstaproetes, gooi ’n piekniekkombers oop by een van die drie aangewese plekke daarvoor langs die Mooirivier, vang ’n forel, of gaan leer meer van die Sanrotskuns by die Rotskunssentrum. As jy verkies om die ware Jakob te sien gaan op ’n begeleide rotskunstoer na die Game Pass Shelter.
Geriewe Toegeruste kombuis, eie braaiplek (bring jou eie hout). Hier is ’n daaglikse skoonmaakdiens, maar jy moet jou eie skottelgoed was. DStv in die gemeenskaplike sitkamer.
Wat pla? Jy weet reeds hoe lyk Ezemvelo KZN Wildlife se chalets – basies en skoon. Bring jou eie steakmes.
Koste Tweebedchalets: vanaf R780 p.n.; sesbedchalet: vanaf R900 p.n. vir 4 mense, R115 p.p. wat bykom. Dagbesoekers betaal R40 p.d. (volwassenes) en R20 p.d. (kinders jonger as 12). Begeleide staproete na die rotskuns R75 p.p.; permit vir forelvang R130 p.d.
Hoe kom ek daar? Neem die R103 van Mooirivier na Rosetta, en draai regs op Mpofanaweg (net verby die Rosetta-hotel; wees op die uitkyk vir die duidelike bruin padaanwysers na Kamberg). Dis sowat 32 km teerpad, en die laaste 10 km is grondpad.
Kontak 033 845 1000; bookings@kznwildlife.com; kznwildlife.com