WIHAN SCHOOMBIE
Samsung S7-selfoon
WIHAN VERTEL: Ek woon in Canberra, Australië, en is in die weermag hier. Hierdie foto is geneem op Oujaarsdag 2017 tydens ’n ontplooiing in Afganistan se Kandahar-provinsie. Ek was agter in ’n C130J-vragvliegtuig terwyl die son oor die vliegveld gesak het. Gelukkig was my selfoon in my sak en ek kon dit gou uitpluk om die sonsondergang af te neem.
Die vragvliegtuig op die agtergrond is ’n Russies vervaardigde ILyushin IL-76vragvliegtuig.
Dankie vir julle tydskrif, dit help baie om die “homesick”-simptome te verlig... of erger te maak!
TOAST SÊ: Hopelik voel jy altyd beter nadat jy ’n Weg- tydskrif deurgeblaai het! Dis ons plesier om al die mooi van Suid-Afrika en elders in Afrika te deel met Suid-Afrikaners wat dalk nou oorsee woon. En daarom is dit ook ’n plesier om iets uit die verre met ons plaaslike lesers te deel – dis wraggies die eerste keer dat ons ’n foto plaas wat in Afghanistan geneem is!
Die slimfoon is ’n wonderwerk, want danksy die ingeboude kamera het jy nou elke dag, heeldag lank, ’n kameratjie in jou hemp- of broeksak. Jy pluk dit net uit, en kiek – dalk sommer net met een hand as jy gesout is.
Wihan se silhoeët is soortgelyk as Chris s’n hiernaas: Waar Chris sy hoofvoorwerp (die mens op die foto) met die grotbek geraam het, het Wihan syne met die vliegtuigdeur geraam. Die sakkende son (korrek belig) en die ander vliegtuie sorg dat jou oog dieper die raam in gelok word om meer te sien.
Nóg ’n foto wat ’n storie vertel!