Hartlike kos vra vir volronde rooiwyn
Hopelik beteken winter vanjaar heelwat reën in die WesKaap – om ons damme vol te maak én sodat ons sonder skuldgevoelens langs die kaggel kan sit en rooiwyn drink. Bly warm met hierdie nuwe wyne. Die eerste is dalk die winskoop van die dekade. Jy gaan sukkel om meer geur, karakter en genot uit R58 te put! Dis nou False Bay – die intreevlak-etiket van die Waterkloof-wynlandgoed naby Somerset-Wes – se Old School Syrah 2017. Die False Bay-reeks het onlangs ’n gedaanteverwisseling ondergaan en ek is gaande oor die nuwe verpakking, maar ek hou ook van die geure. Die syrah is koel gefermenteer sodat dit ekstra parfuum en aroma het. Die smaak van swart vrugte en kruie stel nie teleur nie. Dit gaan dié winter my voorkeurwyn wees.
Daar’s iets aan ’n organiese wyn wat dit laat voel asof dit gesonder is vir jou. As ’n mens daai logika gebruik, behoort ’n biodinamiese wyn mos dubbel so goed vir jou te wees! Hierdie een is beslis: Die Reyneke Biodynamic Syrah 2015 (R175) word op die natuurlikste moontlike manier gemaak – geen mensgemaakte chemiese stowwe of bemesting word gebruik wanneer die druiwe gekweek en die wyn gemaak word nie. Dis ’n heerlike syrah met swart vrugte, speserye en eikehout – ’n perfekte bederf op ’n koue middag.
As jy dié winter meer geld op ’n besonderse wyn wil uitgee, moet dit ’n Bordeaux wees. Wel, ’n Kaapse Bordeaux-versnit, in elk geval, soos die Delheim Grand Reserve 2014 (R285), wat meestal cabernet sauvignon is, met tikkies cabernet franc en merlot. Hierdie wyn is tot dusver net ná uitstekende oeste gemaak – twee keer die afgelope ses jaar. Dit het ’n kruidagtigheid danksy die cabernet franc, gekombineer met die ryk, warm geure van swart vrugte. As jy lamsvleis eet, hoort dié wyn op die tafel.